Qazaqstandaǵy JOO-larda oqý aqysy qansha turady
ASTANA. KAZINFORM - Qazirgi kezde elimizdegi kóp ýnıversıtet oqý aqysy týraly aqparattardy bólisip jatyr. Keıbir oqý oryndarynda joǵary bilim alý birneshe mıllıon teńge turady, dep habarlaıdy Kazinform tilishsi.
Bakalavrıatqa túsken birinshi kýrs stýdentiniń oqý aqysyn salystyrdyq. Ýnıversıtetter 2025-2026 oqý jyldarynyń aqysy týraly aqparatty resmı saıttarǵa jarııalady. Oqý aqysyna taldaý jasaý kezinde ulttyq joǵary oqý oryndary men aımaqtyq oqý oryndary týraly aqparat saralandy.
Bárinen Ál-Farabı atyndaǵy Qazaq ulttyq ýnıversıtetinde bilim alý arzanǵa túsedi. Munda oqý aqysy 500 myń teńgeden bastalady. Bul aqshaǵa tek meıirbıke isi mamandyǵyn alyp shyǵýǵa bolady. Al ózge mamandyqtardyń oqý aqysy 1,1 mln teńgeden bastalyp, 1,7 mln teńgege deıin jetedi.
Kelesi orynda E.A.Bóketov atyndaǵy Qaraǵandy memlekettik ýnıversıteti tur. Munda jyl saıyn 505 200 teńge tólep pedagogıka mamandyǵyn meńgerýge bolady. Eń joǵary oqý aqysy – 812 500 teńge. Bul ınjener, aqparattyq-kommýnıkatsııalyq tehnologııa mamandyǵyn meńgerisi keletin adamdarǵa arnalǵan oqý aqysy.
Al A.Baıtursynov atyndaǵy Qostanaı memlekettik ýnıversıtetinde kóp mamandyqty ıgerý quny - 535 200 teńge. Munda bolashaq pedagogter bilim alady. Fılologııa, aýyl sharýashylyǵy mamany, ınjener men bıznesti de meńgerýge bolady.
S.D.Asfendııarov atyndaǵy Qazaq memlkettik medıtsınalyq ýnıversıtetinde bilim alý sál qymbat. Munda eń tómen oqý aqysy – 550 myń teńge. Bul aqshaǵa tek meıirbıke isi mamandyǵyn alyp shyǵady. Dál osy mamandyqty qysqa ýaqytta meńgerip alýǵa bolady. Al medıtsına, pedıatrııa, klınıkalyq psıhologııa, sonymen birge meıirbıke isi mamandyǵynyń tolyq kýrsynyń baǵasy mıllıon teńgeden joǵary. Eń qymbaty - stomatologııa mamandyǵy. Oqý aqysy jylyna – 2,1 mln teńge.
H.Dosmuhamedov atyndaǵy Atyraý ýnıversıtetinde baǵa qoljetimdi. Munda eki ǵana baǵa bar. Olar: 560 myń jáne 63 myń teńge. Óner jáne gýmanıtarlyq ǵylym, sonymen birge jaratylystaný, matematıka, statıstıka jáne qyzmet kórsetý salasyna baǵa tómen. Al pedagogıka, bıznes, basqarý jáne quqyq, ınjener, jýrnalıstıka mamandyǵyn meńgerý sál qymbat.
Toraıǵyrov ýnıversıtetinde de baǵa osy shamalas. Munda oqý aqysy 596 200 - 624 800 teńge aralyǵynda. Mamandyqqa, sonyń ishinde tehnıkalyq salaǵa tańdaý kóp. Pavlodar óndiristi aımaq bolǵan soń tehnıkalyq sala mamanyna únemi suranys joǵary.
D.Serikbaev atyndaǵy Shyǵys Qazaqstan tehnıkalyq ýnıversıtetinde oqý aqysy 609 840 teńgeden bastalady. Bul aqshaǵa bıznes jáne basqarý mamandyǵyn meńgerýge bolady. Al ózge mamandyqtyń kóbi 805 860 teńge dep belgilengen.
Á.Marǵulan atyndaǵy Pavlodar pedagogıkalyq ýnıversıtetinde pedagogıka mamandyǵyn meńgerý quny 697 myń teńgeden bastalady. Munda mektepke deıingi uıym qyzmetkerlerin, bastaýysh synyp jáne túrli pánnen sabaq beretin muǵalimderdi daıyndaıdy.
S.Seıfýllın atyndaǵy Qazaq agrotehnıkalyq zertteý ýnıversıtetinde baǵa joǵary. Munda oqý aqysy 831 myń teńgeden bastalyp, 1 028 500 teńgege deıin jetedi. Eń qymbaty – artıtektýra.
Abaı atyndaǵy Qazaq ulttyq pedagogıkalyq ýnıversıtetinde oqyp, pedagog atanýǵa bolady. Munda eń tómengi oqý aqysy 900 myń teńge. Eń qymbaty óner jáne gýmanıtarlyq ǵylym salasy. Jyldyq oqý aqysy – 1 130 00 teńge.
Satbayev University-de oqý aqysy 905 760 – 1 278 060 teńge aralyǵynda. Munda bakalavrıatta 72 mamandyq bar.
S.Demırel ýnıversıtetinde oqý aqysy mıllıon teńgeden joǵary. Almaty qalasy mańyndaǵy ýnıversıtetti tańdasa oqý aqysy 1 080 000 – 2 400 000 aralyǵynda.
L.N. Gýmılev atyndaǵy Eýrazııa ulttyq ýnıversıtetinde bakalavr mamandyqtaryn oqý 1 350 00 teńgeden bastaldy. Munda pedagogıka, óner jáne gýmanıtarlyq ǵylym, áleýmettik sala, jaratylystaný ǵylymy, qyzmet kórsetý, bıznes, basqarý jáne quqyq mamandyqtarynyń oqý aqysy 1 600 00 teńge.
Narhoz ýnıversıtetinde oqý aqysy 1 kredıt júıesi boıynsha esepteledi. 1 kredıt quny - 23 000 – 38 700 teńge aralyǵynda. Jylyna orta eseppen 60 kredıt alsa, oqý aqysy 1 380 000 – 2 322 000 teńge bolyp shyǵady.
Nazarbaev ýnıversıtetinde oqý aqysy dollarmen esepteledi. Bakalavr munda jylyna 15 myń dollar bolyp tur. Qazaqstandyqtar oqý aqysyn teńgemen tóleıdi. Dollardyń kýrsy ázirge 511 teńge dep eseptelgen. Joǵary oqý ornynda bilim alý - 7 665 00 teńge.
Elimizdegi eń qymbat joǵary oqý orny – KIMEP ýnıversıteti. Munda 1 kredıt quny 145 090 teńge. Oqý aqysy jylyna - 8 705 400 teńge.
Aıta keteıik, buǵan deıin Qazaqstanda memlekettik bilim granttary ıegerleriniń tizimi jarııalandy.