Elimizdegi sırek metaldarǵa qaı elder «quda túsip» otyr
ASTANA. KAZINFORM – Syrtqy ister mınıstrligi Kazinform saýalyna joldaǵan jaýabynda eldegi sırek metal kenishterin barlap, óndirýge qaı elderden usynys túskenin aıtty.
Jalpy sheteldik ınvestorlar sırek kezdesetin metaldar ken oryndaryn ıgerý boıynsha Qazaqstanǵa aıtarlyqtaı qyzyǵýshylyq tanytýda. Investorlar elektronıka, magnıt jáne akkýmýlıator óndirisi sııaqty joǵary tehnologııalyq salalar úshin mańyzdy jańa ken oryndaryn belsendi izdestirýde.
«Búgingi tańda Germanııa, Ońtústik Koreıa, Qytaı, AQSh jáne Ulybrıtanııa sııaqty elderdiń sheteldik ınvestorlarynan sırek kezdesetin metaldar salasyndaǵy yntymaqtastyqty nyǵaıtý týraly usynystar kelip tústi. Sonymen qatar, Japonııa, Indonezııa jáne Frantsııa sııaqty elder osy baǵytta qarym-qatynas ornatýǵa nıetti. «Kazakh Invest» UK» AQ tarapynan atqarylǵan jumys sheńberinde bul salaǵa birqatar sheteldik kompanııa tartylǵan. 2024 jyldyń sońyna deıin Almaty oblysyndaǵy ken ornynda volframdy qaıta óńdeý boıynsha taý-ken baıytý kombınaty paıdalanýǵa beriledi. Investıtsııanyń kólemi 350 mln AQSh dollaryn quraıdy», - dep jazady mınıstrliktegiler.
Vedomstvo jaýabynda keıbir ınvestıtsııalyq kelisimderdiń mazmuny qupııa ekeni aıtylǵan.
«Qalǵan jobalar boıynsha ınvestıtsııalardyń qunyn kórsetý kompanııalarmen qol qoıylǵan qupııalyq týraly kelisimderge sáıkes múmkin emes ekenin atap ótemiz. Sırek kezdesetin elementter men sırek jer metaldarǵa qatysty qolda bar ózekti jobalar boıynsha ınvestıtsııalar kóleminiń aıtarlyqtaı óskenin atap ótken jón. Qazirgi ýaqytta osy jobalarǵa sáıkes lıtıı, ıttrıı, molıbden, vanadıı jáne nıobıı sııaqty elementter boıynsha barlaý jáne qosymsha barlaý jumystary júrgizilýde», - delingen resmı jaýapta.
