Qazaqstandaǵy konstıtýtsııalyq reformalar: Brıýssel kózqarasy
ASTANA. KAZINFORM — Qasym-Jomart Toqaev bastamashy bolǵan reformalar Qazaqstannyń josparly saıası evolıýtsııaǵa bet alǵanyn bildiredi. Mundaı pikirdi jalpyeýropalyq «EUalive.net» medıa-jelisiniń baspageri Georgı Gotev Kazinform agenttiginiń menshikti tilshisimen bolǵan áńgime barysynda aıtty.
Sarapshy birneshe jyl boıy Qazaqstandaǵy saıası jaǵdaıdy muqııat zerttep keledi. Onyń pikirinshe, Prezıdent qolǵa alǵan reformalardy birneshe aspektigi bóle qaraǵan jón. Sonyń ishinde 2022 jylǵy Konstıtýtsııalyq referendým (prezıdenttik merzimderdi bir merzimge qysqartý), jergilikti ákimderdi tikeleı saılaý, adam quqyǵy, sybaılas jemqorlyqqa qarsy sharalar jáne «Jańa Qazaqstan» kontseptsııasy bar.
— Sońǵy qadam aýqymdy ınstıtýtsıonaldyq ózgeristerdi qamtıdy: bir palataly Parlamentke ótý, depýtattardy tek partııalyq tizim boıynsha saılaý, vıtse-prezıdent laýazymyn engizý, Konstıtýtsııada «Zań men Tártip» prıntsıpin bekitý jáne odan ári túzetýlerdi ázirleýge arnalǵan Konstıtýtsııalyq komıssııa qurý bastamalary bar. Meniń oıymsha, atalǵan reformalar burynǵy baǵytpen sabaqtas, ıaǵnı ashyqtyq qamtamasyz etilip, zań ústemdigi men azamattardyń qoǵamdyq sheshimge aralasýy nazarda bolady, — dedi Gotev.
Spıker atap ótkendeı, júıede áli de prezıdenttik sıpat basym.
— Jalpy alǵanda, Qasym-Jomart Toqaevtyń reformalary eldiń saıası júıesin josparly evolıýtsııa jolymen damytýǵa baǵyttalǵan jáne Qazaqstannyń halyqaralyq arenadaǵy orny men bedelin nyǵaıtý oıy bar, — dedi ol.
Sondaı-aq Georgı Gotev júzege asyp jatqan reformalar Qazaqstannyń syrtqy saıasatyna qalaı áser etetinin baǵamdady.
— Qasym-Jomart Toqaev syrtqy saıasatta kópvektorly prıntsıpke súıenedi, bul — el táýelsizdik alǵan 1991 jyldan beri ustanyp kele jatqan strategııa. Mundaı doktrına ulttyq qaýipsizdikti, aýmaqtyq tutastyqty, ekonomıkalyq múddelerdi qorǵaýǵa baǵyttalǵan. Ol úshin iri álemdik jáne aımaqtyq derjavalarmen pragmatıkalyq qarym-qatynas júrgizý mańyzdy, — dedi ekspert.
Georgı Gotev Qazaqstandy EO úshin ekonomıkalyq jáne geosaıası turǵyda mańyzdy seriktes dep baǵalady. Oǵan qosa EO elderi Qazaqstan úshin senimdi ári ózara tıimdi odaqtas bola alady degen ustanymda.