Qazaqstanda jyl saıyn 1300 jasóspirim qyz túsik jasatady

NUR-SULTAN. QazAqparat – Elimizde jyl saıyn 5 myńǵa jýyq jasóspirim qyz júkti bolady. Bul týraly búgin BAQ ókilderimen kezdesken QR Densaýlyq saqtaý mınıstri Eljan Birtanov aıtty, dep habarlaıdy QazAqparat tilshisi.

«Bul máselemen biz úkimettik emes uıymdarmen, halyqaralyq uıymdarmen birlesip aınalysyp jatyrmyz. BUU-da kómektesedi. Olardyń derekterine sáıkes, 16-18 jas aralyǵynda jasóspirim qyzdardyń júkti bolýynyń 4 800-5 000 deregin tirkeımiz. Ókinishke qaraı, erte jynystyq ómirge aralasý faktileri bar. Buǵan qosa, jyl saıyn shamamen dál osy sanattaǵy turǵyndardyń 1200-1300 túsik jasatýy tirkeledi. Árıne, olardyń barlyǵy da medıtsınalyq kórsetilim men qarsy kórsetilimge saı qaýipsiz jaǵdaıda, qorǵalǵan túrde júrgiziledi», - dedi ol.

Onyń aıtýynsha, túsik jasatý zańdy túrde júrgizilýi qajet. Dárigerler mundaı jaǵdaıdy baqylaýynda ustap otyrýy tıis.

«Júkti qyzdy ýchaskelik dáriger nemese emhanalardyń janynan qurylatyn Jasóspirimder densaýlyǵy ortalyǵynyń dárigeri mundaı sheshimdi ata-anasynyń qabyldaýyna kóndirý qajet. Olar nege jáne qandaı qaýpi bar ekendigin túsindirýi tıis. Medıtsınalyq mekemeden tys jaǵdaıda júktilikti úzý óte qaýipti. Qyzdar densaýlyǵyna nuqsan keltirýmen qatar, bolashaqta ana bolý quqyǵynan, tipti ómirlerinen aıyrylýy múmkin. Mundaı problema bar jáne oǵan kóz juma qaraýǵa bolmaıdy. Keıbireýler muny mekteptiń emes, ata-ananyń máselesi ekendigin aıtady. Alaıda, ókinishke qaraı ata-analardyń barlyǵy bul jaǵdaıdy jete túsine bermeıdi. Sondyqtan biz kodekske mektepterge naqty jaýapkershilik júktep, baǵdarlama júrgizýdi usyndyq. Sóz reprodýktıvti densaýlyqty qorǵaý jaıynda bolyp otyr», - dedi Eljan Birtanov.