Qazaqstanda jyl basynan qansha sharshy metr baspana paıdalanýǵa berildi

NUR-SULTAN. QazAqparat – Bııylǵy 9 aıda qazaqstandyqtarǵa 10,4 mln sharshy metr turǵyn úı paıdalanýǵa berilgen. Bul, byltyrǵy kórsetkishten 8 paıyz kóp. Úkimet otyrysynda QR Premer-Mınıstri Asqar Mamın osylaı dedi. dep habarlaıdy QazAqparat tilshisi.

«Qurylystyń ósý qarqyny 9,7 paıyz deńgeıinde. 9 aıda elde 10,4 mln sharshy metr turǵyn úı paıdalanýǵa berildi, bul ótken jylmen salystyrǵanda 8 paıyzǵa kóp.

Investıtsııalardyń qalypqa kelýi belsendi túrde jalǵasyp, 2 paıyz boldy. Al taý-ken óndirisin eseptemegende – 15,1 paıyzdy qurap otyr.

Negizgi kapıtalǵa ınvestıtsııalardyń joǵary kórsetkishteri qurylysta, óńdeý ónerkásibinde, saýdada, aýyl sharýashylyǵynda, jyljymaıtyn múlik operatsııalarynda, qarjy qyzmetinde, aqparat pen baılanysta baıqaldy», - dedi Asqar Mamın.

Úkimet basshysynyń aıtýyna qaraǵanda, iskerlik belsendilikti odan ári qalpyna keltirý jáne sapaly ınvestıtsııalar tartý jumysyn jalǵastyryp, odan ári kúsheıtýdiń mańyzy zor. Sondaı-aq, ol makroekonomıkalyq kórsetkishteri joǵary óńirlerdi atady.

«Qańtar-qyrkúıektiń qorytyndysy boıynsha barlyq negizgi makrokórsetkish boıynsha ósim Almaty, Aqmola, Jambyl, Qostanaı oblystary men Shymkentte baıqalady», - dedi Premer-Mınıstr.