Qazaqstanda joǵary oqý oryndaryndaǵy áskerı kafedralar tekserile bastaıdy
ASTANA. KAZINFORM – Qazaqstannyń Qorǵanys mınıstrligi joǵary oqý oryndary janyndaǵy áskerı kafedralarda bilim berý jaǵdaıy men oqytý sapasyna júıeli monıtorıng engizip otyr.
Bul týraly vedomstvo Kazinform agenttiginiń resmı saýalyna bergen jaýabynda habarlady.
Mınıstrliktiń málimetinshe, buǵan deıin joǵary jáne joǵary oqý ornynan keıingi bilim berý uıymdarynda zapastaǵy ofıtserler men serjanttardy daıarlaý baǵdarlamalary boıynsha áskerı daıyndyq sapasyn baǵalaıtyn jáne taldaıtyn biryńǵaı tetik bolmaǵan.
Osyǵan baılanysty bıyl Qorǵanys mınıstriniń buıryǵymen áskerı daıyndyqtyń sapasyn baqylaý jáne taldaý qaǵıdalary qoldanysqa engizildi.
Tekserý barysynda bilim berý úderisi men áskerı daıarlanǵan rezervti daıyndaý nátıjeleri, sondaı-aq áskerı kafedralardyń oqý-materıaldyq bazasynyń jáne kadrlyq quramynyń belgilengen normatıvtik talaptarǵa sáıkestigi baǵalanatyn bolady.
Vedomstvo dereginshe, qazirgi tańda eldegi 40 áskerı kafedranyń segizi qarý-jaraqpen jáne áskerı tehnıkamen tolyq jabdyqtalmaǵan.
– Olardyń basym bóligi áskerı-dárigerlik mamandardy daıarlaý ereksheligine baılanysty medıtsına joǵary oqý oryndary janyndaǵy kafedralar, sondaı-aq jýyrda ǵana qurylǵan keıbir áskerı kafedralar, – dep túsindirdi Qorǵanys mınıstrligi.
Atalǵan segiz áskerı kafedrany qosymsha jaraqtandyrý 2026 jyly josparly tártippen júzege asyrylady.
Mınıstrlik ókilderi anyqtalǵan zańbuzýshylyqtar boıynsha joǵary oqý oryndaryna olardy joıý úshin belgili bir merzim beriletinin atap ótti.
Eger talaptarǵa saı áreket jasalmasa, áskerı kafedra Qorǵanys mınıstriniń ýákiletti organmen kelisimi boıynsha qabyldanǵan sheshimimen taratylýy múmkin.
Aıta keteıik, buǵan deıin Senator Darhan Qydyráli Qazaqstandaǵy áskerı bilim berý júıesine aýqymdy reformalar qajet ekenin aıtqan bolatyn.