Qazaqstanda joǵary bilimdi halyq sany ósip keledi

Bul týraly Ulttyq statıstıka bıýrosy shyǵarǵan bilim berý týraly taqyryptyq jınaqtan málim boldy, dep habarlaıdy Kazinform.

Jınaqtaǵy derekterge qaraǵanda, elimizdiń árbir tqrtinshi turǵynynyń joǵary bilimi bar. 2021 jylǵy sanaq kezinde 3,7 mln adamnyń joǵary bilimi, 4,1 mln adamnyń arnaıy orta bilimi, 4,9 mln adamnyń orta bilimi bolǵan. 2009 jylǵy sanaqpen salystyrǵanda joǵary bilimi bar halyqtyń úlesi 19,8%-dan 2021 jyly 27,6%-ǵa deıin ósken.

Óńirlerdiń ishinde joǵary bilimi bar halyqtyń eń kóp sany Almaty oblysyna tıesili – 404,8 myń adam. Árbir óńirdegi joǵary bilimi bar halyqtyń úlesi boıynsha Astana qalasy kósh bastap tur – elorda halqynyń 25,5% JOO bitirgen.

Joǵary bilimi bar erler men áıelderdiń úlesi birdeı. 2009 jylǵy sanaqpen salystyrǵanda dıplomy bar erlerdiń úlesi 17,8%-dan 27,9%-ǵa deıin, áıelderdiki 21,6%-dan 27,3%-ǵa deıin ósken.

Jalpy 1000 adamǵa shaqqanda ýnıversıtet dıplomy bar 276 adamnan keledi, 2009 jyly bul kórsetkish 198 adam deńgeıinde boldy.

Sondaı-aq jınaqtaǵy málimetterge qaraǵanda, 4,1 mln qazaqstandyqtyń arnaıy orta bilimi bar. 2021 jylǵy sanaq kezinde 4 167 myń qazaqstandyqtyń arnaıy orta bilimi bolǵan. 2009 jylǵy sanaqpen salystyrǵanda olardyń halyq arasyndaǵy úlesi 27,6%-dan 30,8%-ǵa deıin ósti.

Túrkistan oblysy tehnıkalyq jáne kásiptik bilimi bar halyq sany boıynsha da, óńirdegi arnaıy orta bilimi bar halyq úlesi boıynsha da kósh bastaǵan – 8,9%.

Sonymen qatar Qazaqstanda 120 myńnan astam adamnyń ǵylymı dárejesi bar. 2021 jylǵy sanaq kezinde 120,8 myń qazaqstandyqtyń joǵary oqý ornynan keıingi bilimi bolǵan. Olardyń basym bóligi (17,8%) 30-34 jas aralyǵyndaǵylar. Ǵalymdardyń jalpy sanynyń 78% – magıstr (96,9 myń adam), 3,6% – fılosofııa doktory (PhD), (4,5 myń adam), 13,5% – ǵylym kandıdaty (16,8 myń adam), 4% ǵylym doktory (4,9 myń adam) dárejesine ıe.