Qazaqstanda jeke derekterge qol jetkizý erejeleri ózgertildi
ASTANA. KAZINFORM — Tsıfrlyq damý, ınnovatsııalar jáne aeroǵarysh ónerkásibi mınıstrliginiń 2025 jylǵy 30 mamyrdaǵy buıryǵymen jeke derekterge qol jetkizýdi baqylaý boıynsha memlekettik servıstiń ıntegratsııalaý erejelerine ózgerister men tolyqtyrýlar engizildi. Qujat jobasy «Ashyq NQA» portalynda jarııalandy.
Jańa erejede birneshe negizgi uǵym naqtylandy, ıaǵnı bank, jeke derekterge qol jetkizýdi baqylaý boıynsha memlekettik servıs, jeke derekteri bar derekqor operatory, jeke derekter sýbektisi, qaýipsizdik tokeni taǵy sol sııaqty.
Endigi ýaqytta jeke derekterdi alý týraly ótinimde tómendegi derekterdi kórsetý qajet:
— jeke derekterge qol jetkizý júzege asyrylatyn qyzmetterdiń ataýy;
— naqty qyzmetterdi kórsetý úshin qajetti servıster jáne bıznes-protsesterdiń sıpattamasy;
— qyzmet kórsetý merzimi;
— jeke derekterdi saqtaý jáne óńdeý ýaqyty;
— jeke derekterdi saqtaý negizdemesi.
— Eger ótinim Qazaqstan Respýblıkasynyń qoldanystaǵy zańnamasyna sáıkes kelmese, ol qaıta qaraýǵa jiberiledi. Sondaı-aq ótinim bergen kezde, jeke derekterdi jınaýǵa, óńdeýge nemese olardy úshinshi tulǵaǵa berýge sýbektiniń kelisimin (ne bas tartýyn) alýdy qamtıtyn suraý jiberý tásilderiniń biri tańdalady, — delingen qujatta.
Aqparattyq júıeler, aqparattyq-kommýnıkatsııalyq tehnologııalar jáne aqparattyq qaýipsizdik talaptaryna sáıkes kelgen jaǵdaıda, sondaı-aq aqparattyq qaýipsizdik talaptaryna sáıkestik synaq hattamalary bolǵanda kelesi suraý\jaýap tásilderi qoljetimdi:
— «1414» biryńǵaı baılanys ortalyǵy arqyly suraý/jaýap, bul tásil bastamashylar men operatorlarǵa qoljetimdi;
— bastamashy nemese operator quraldarymen suraý/jaýap bankter nemese ýákiletti organmen kelisimge kelgen bastamashylar men operatorlarǵa, olardyń aqparattyq júıeleri aqparattyq qaýipsizdiktiń jedel ortalyǵyna ıe bolǵan jaǵdaıda qoljetimdi;
— proaktıvti qyzmet kórsetý aıasynda bastamashynyń quraldarymen suraý/jaýap, bul tásil proaktıvti qyzmet kórsetetin bastamashylarǵa qoljetimdi;
— hattamalaý rejıminde suraý/jaýap;
— memlekettik servıske suraý/jaýap SMS-habarlamalar arqyly «Mobıldi úkimet» aqparattyq júıesi arqyly júzege asyrylady. Bul tásil bastamashylar men operatorlarǵa qoljetimdi, munda suraý bir rettik árip-sandyq nemese sandyq kod túrindegi SMS-habarlama túrinde memlekettik servıske jiberiledi, al jaýap dál sondaı formattaǵy kodpen SMS-habarlama túrinde usynylady.
— bastamashy men operator quraldarymen suraý/jaýap tásilin tańdaǵan jaǵdaıda memlekettik servıspen ıntegratsııalaý ótinimine synaq hattamalary qosa berilýi tıis.
Buıryq 2025 jylǵy 20 maýsymnan bastap kúshine enedi.
Aıta keteıik, elimizde jeke derekter jınaıtyn kompanııalardan kıbersaqtandyrý talap etiledi.
Eske salaıyq, qazaqstandyqtar jeke derekteri taratylsa, ótemaqy ala alady.