Qazaqstanda «jasyl» salyq engizý usynyldy
ASTANA. KAZINFORM – Májilis depýtaty Ajar Saǵyndyqova Qazaqstanda qaldyqtardy basqarý boıynsha jeke zań jobasyn ázirleýdi usynyp otyr.
– Ókinishke qaraı, qoldanystaǵy Ekologııalyq kodeksti tereńirek qarastyrý qajet jáne birqatar álsiz tustary baryn kórip otyrmyz. Áli kúnge deıin qaldyqtardy bólek jınaý men qatty turmystyq qaldyqtardy júıeleý máselesi boıynsha ǵylymı zertteý júrgizilgen joq. Bul týraly ótken aptada Májiliste ótken dóńgelek ústelde aıttyq. Sol jerde jumys toby aıasynda turmystyq qatty qaldyqtardy óńdeý máselesin júıeli ári qaıta qaraý týraly sheshim qabyldandy. Sondaı-aq turmystyq qatty qaldyqtardy basqarý boıynsha ýákiletti organ men jergilikti atqarýshy organnyń jaýapkershiligi aıqyndalady, - dedi Ajar Saǵyndyqova Astanada ótken IX eýrazııalyq bıznes forýmynda.
Halyq qalaýlysynyń aıtýynsha, depýtattar ázirlegen birqatar jańa túzetý jumys tobynda talqylanady.
– Atap aıtqanda, biz qaldyqtardy basqarý boıynsha jeke zań jobasyn ázirleıtin ýaqyt keldi dep sanaımyz. Bul zań jobasy ókilettik, jaýapkershilik, standarttar men ınfraqurylymǵa qoıylatyn talaptardy jáne memlekettik yntalandyrý tetikterin júıege keltirýge múmkindik beredi. Sondaı-aq ekologııalyq emes oramalarǵa «jasyl» salyq engizý jáne túsken qarajatty qaıta óńdeý salasyn damytýǵa baǵyttaǵan jón, — deıdi Ajar Saǵyndyqova.
Búgin Astanada «Jańartylatyn energııa jáne qaldyqtardy qaıta óńdeý» atty taqyrypta ІH eýrazııalyq bıznes-forým ótti.
Búgin Úkimet basshysy Oljas Bektenov Daı Daogomen «jasyl» energetıka salasyndaǵy yntymaqtastyq perspektıvalaryn talqylady.
Jaqynda ǵana Ekologııa kodeksi qaldyq óńdeý erejeleri turǵysynan qaıta jazylýy múmkin ekenin habarlaǵan edik.