Qazaqstanda jańa brendterdi tirkeý merzimi qysqarady
Ádilet vıtse-mınıstri Botagóz Jaqselekova zııatkerlik menshik týraly zańnamaǵa qatysty konsýltatıvtik qujattardy talqylaý nátıjesi jónindegi túsinik berdi, dep habarlaıdy Kazinform.
«Atap aıtqanda, zııatkerlik menshik quqyǵyn qorǵaýǵa baǵyttalǵan keshendi qujat ázirlendi. Avtorlyq quqyqty buzǵany úshin jaýapkershilikti belgileý ári naqtylaý týraly tıisti erejeler bar. Sonymen qatar qaǵaz nusqadaǵy ádebıetterdi oqı almaıtyn, ıaǵnı densaýlyq jaǵdaıyna baılanysty birqatar adamnyń quqyǵyn qorǵaýǵa baǵyttalǵan normalar bar. Bul rette biz avtordyń quqyǵyn belgili bir dárejede shektep, osyndaı múgedektigi bar jandardyń erekshelikterin eskere otyryp, baspalarǵa tıisti ádebıetterdi shyǵarýǵa múmkindik beremiz», - dedi B.Jaqselekova Ádilet mınıstrliginde tilshiler suraǵyna jaýap bere otyryp.
Sonymen qatar ol elimizde brendterdi tirkeý merzimin qysqartý týraly usynys jasalǵanyn aıtty.
«Kásipkerler brendti tez arada ilgeriletý maqsatynda tıisti ótinishterin aıtyp jatyr. Máselen, dál qazir bir brend trendte bolsa, biraz ýaqyttan keıin oǵan suranys tómendeýi múmkin. Sondyqtan tirkeý merzimin qysqartý týraly usynys jasaldy. Biz bul usynysqa qoldaý bildirdik, rasynda da álemde mundaı úrdis bar. Qazir kórshi elderde de mundaı normatıvtik-quqyqtyq aktiler daıyndalǵan. Endi kásipkerlerdiń ótinishi boıynsha tirkeý merzimi qysqartylmaq», - dedi vıtse-mınıstr.
