Qazaqstanda zeınetaqynyń ortasha mólsheri 95 myń teńgeni quraıdy

NUR-SULTAN. QazAqparat - Jyl basynan beri qazaqstandyqtarǵa 1,8 trln teńgeden astam somaǵa zeınetaqy tólendi. Bul týraly QR Eńbek jáne halyqty áleýmettik qorǵaý mınıstrliginen málim etti, dep habarlaıdy QazAqparat.

«2020 jylǵy qańtar-qyrkúıek aılarynda respýblıkalyq bıýdjetten bazalyq zeınetaqy tóleýge 576,4 mlrd teńge, yntymaqty zeınetaqy tólemderine – 1 trln 285,4 mlrd teńge baǵyttaldy», - dedi mınıstrlikten.

Bıylǵy 1 qazandaǵy jaǵdaı boıynsha Qazaqstanda zeınetkerler sany 2 mln 212 myń adamdy quraıdy.

Zeınetaqynyń ortasha mólsheri (onyń ishinde bazalyq zeınetaqy) 94 913 teńgeni quraıdy.

Eske salaıyq, 2018 jylǵy 1 shildeden bastap memlekettik bazalyq zeınetaqy tólemi, onyń zeınetaqy júıesindegi tájirıbesin eskere otyryp, ár alýshyǵa jeke taǵaıyndalady.

Bul rette, 1998 jylǵy 1 qańtardaǵy jaǵdaı boıynsha yntymaqty júıede jumys istegen ýaqyty, sondaı-aq mindetti zeınetaqy jarnalary tólengen kezeńder zeınetaqy júıesindegi eńbek ótiline qosylady.

Sonymen, eger zeınetaqy júıesindegi jumys ótili 10 jyl nemese odan az bolsa, sondaı-aq eger múlde joq bolsa, bazalyq zeınetaqy eń tómengi kúnkóris deńgeıiniń 54% quraıdy. Sodan keıin 10 jyldan asqan ár jyl úshin onyń mólsheri 2% artady. Mysaly, eger siz 20 jyl qatyssańyz, bazalyq zeınetaqy kúnkóris deńgeıi qunynyń 74%, 30 jyl – kúnkóris qunynyń 94% quraıdy. 33 jáne odan da kóp jyl jumys ótili bolsa, kúnkóris qunynyń 100% joǵary mólsherinde belgilenedi.

Eger bir aı ishinde MZJ birneshe ret Biryńǵaı jınaqtaýshy zeınetaqy qoryna jasalsa, jınaqtaýshy júıege qatysý merzimi bir aıdy quraıdy.

Osylaısha, mindetti zeınetaqy jarnalary neǵurlym turaqty jáne tolyq salynatyn bolsa, zeınetaqy jasyna jetkende bazalyq zeınetaqy tólemderiniń mólsheri soǵurlym kóp bolady.

Óz kezeginde, jasyna baılanysty zeınetaqy tólemderiniń mólsheri 1998 jylǵy 1 qańtardaǵy jumys ótiline (kem degende 6 aı qajet) jáne zeınetkerlikke deıingi kezeńde alynǵan ortasha aılyq tabysqa baılanysty bolady.