Qazaqstanda zeınetaqy jınaǵynyń jalpy somasy 10,7 trln teńgege jetti

ALMATY. QazAqparat - Qazaqstanda zeınetaqy jınaǵynyń jalpy somasy 10,7 trıllıon teńgege jetti, dep habarlaıdy QazAqparat tilshisi «Biryńǵaı jınaqtaýshy zeınetaqy qory» AQ baspasóz ortalyǵyna silteme jasap.

Jeke zeınetaqy shotynyń sany 10,6 mln asty. 2019 jylǵy 1 jeltoqsandaǵy jınalǵan zeınetaqy qarajatynyń jalpy somasy jyl basynan beri 14%-ǵa artyp, 10,7 trln teńgeni qurady.

Ósim dınamıkasyn mindetti zeınetaqy jarnalary boıynsha baıqaýǵa bolady. Olardaǵy jınaqtaý somasy jyl basynan bastap 14% -ǵa artyp, 10,4 trln teńgeni nemese (97,7%) qurady.

Mindetti kásiptik zeınetaqy jarnalary boıynsha jınalǵan zeınetaqy qarajatynyń mólsheri 241,8 mlrd teńgeni (barlyq qarajattyń 2,3%) qurady, erikti zeınetaqy jarnalary boıynsha zeınetaqy qarajatynyń mólsheri 1,9 mlrd teńgeni (0,02%) qurady.

Mindetti zeınetaqy jarnalary (MZJ) boıynsha zeınetaqy jınaqtarynyń ortasha somasy 1,1 mln teńgeni qurady. Onyń ishinde erlerde — 1,2 mln teńge, áıelderde — 933,4 myń teńge.

1998 jyldan bastap aı saıynǵy jarnasyn tólegen salymshylar arasynda jınaqtaýdyń ortasha mólsheri er adamdar úshin - 5,1 mln teńge, áıelder úshin - 3,9 mln teńge boldy.

BJZQ-da eseptelgen taza ınvestıtsııalyq kiris jyl basynan beri 600,5 mlrd teńgeni qurady.

Jınaqtalǵan zeınetaqy qarajatynyń kirisi jyl basynan beri 6,16% -dy qurady, ınflıatsııa 4,7%. Ótken jyldyń sáıkes kezeńimen salystyrǵanda 8,13%-dy qurady, ınflıatsııa - 5,4%.