Qazaqstanda zerthanalar alaıaqtyq áreketterge barýy múmkin

NUR-SULTAN. QazAqparat – «Ulttyq akkredıtteý ortalyǵy» Ádisnama jáne normalaý departamentiniń basshysy Almat Orynǵalıuly otandyq naryqtaǵy ónimderdi zerthanalyq synaqtan ótkizýdegi problemalardy atady, dep habarlaıdy QazAqparat tilshisi.

Onyń aıtýynsha, synaq nátıjeleriniń senimsiz bolýynyń sebepteri negizinen zerthanalardyń, sertıfıkattaý organdarynyń belgili bir protsedýralardy júrgizbeı synaq qujattaryn berý arqyly alaıaqtyq áreketke barýy bolyp otyr.

«Eger siz jarnamalyq saıttardy ashsańyz, ónimderdi, qyzmetterdi, menedjment júıelerin sertıfıkattaý boıynsha qyzmet kórsetýge qatysty kóptegen jarnamany kóresiz. Al bul qyzmetterdi zańda belgilengen tártipte akkredıtatsııadan ótpegen tulǵalar, uıymdar usynady. Josyqsyz zerthanalardyń bolýy basqa zerthanalardyń jumysyna, olardyń kirisine, josparlaýyna áser etetini sózsiz. Mysaly, eń tómengi quny 25 000 teńge bolatyn synaqtardy keıbir zerthanalar 12 000, tipti odan da tómen baǵaǵa jasaıdy. Munyń ózi synaqtyń jalǵan ekeniniń belgisi», - dedi Almat Orynǵalıuly Ortalyq kommýnıkatsııalar qyzmetindegi brıfıngte.