Qazaqstanda zergerlik buıym satý talaptary kúsheıtildi

ASTANA. KAZINFORM – Tutynýshylar quqyqtaryn qorǵaý jáne zergerlik naryqtyń ashyqtyǵyn qamtamasyz etý maqsatynda Qazaqstanda zergerlik buıymdardy satýǵa qoıylatyn talaptar kúsheıtildi. Endi QR synamalaý tańbasy joq zergerlik buıymdardy satqany úshin jaýapkershilik qatańdatylady.

Ózgerister 2025 jyldyń 13 naýryzynan bastap kúshine endi. 

Ákimshilik quqyq buzýshylyq týraly kodekstiń 190-1-baby boıynsha, endi zergerlik buıymdardy zańsyz ótkizýshilerdi ákimshilik jaýapqa tartý quzyreti Saýda jáne ıntegratsııa mınıstrligine berildi. Sońǵy jyldary zergerlik buıymdardy satýshylarǵa qatysty aldyn alý sharalary tek eskertý sıpatynda júrgizilip kelgen edi.

QR «Baǵaly metaldar men asyl tastar týraly» zańy boıynsha, el aýmaǵynda zergerlik buıymdar arnaıy saraptamadan ótip, synama tańbasy men rastaıtyn belgisi bolmasa, olardy satýǵa ruqsat etilmeıdi. 

Endi zergerlik buıymdardy satý erejelerin buzǵany úshin 190 myń teńgeden 580 myń teńgege deıin ákimshilik aıyppul belgilendi, aıyppul kásipkerlik sýbektileriniń sanatyna (kishi, orta, iri) baılanysty ózgerip otyrady. Zań buzýshylyqtar qaıtalansa, aıyppul somasy da ulǵaıady.

Buıymnyń túpnusqalyǵyn bilý úshin synama tańbasynyń jáne ataýly belginiń bar-joǵyn tekserý kerek, synama palatasynyń saraptamalyq qorytyndysyn suraǵan jón. Bul talaptar bolmaǵan jaǵdaıda Tehnıkalyq retteý jáne metrologııa komıtetine jáne onyń aýmaqtyq departamentterine habarlasýǵa bolady.

Saýda jáne ıntegratsııa mınıstrligi bul sharalar halyqty josyqsyz satýshylardan, óndirýshilerden qorǵaýǵa jáne Qazaqstannyń zergerlik naryǵyn retke keltirýge baǵyttalǵanyn aıtýda. 

Buǵan deıin Kazinform agenttigi Qazaqstandaǵy zergerlik bıznes, zańdy jáne kóleńkeli naryq týraly saraptama jarııalaǵan bolatyn.