Qazaqstanda zańsyz aınalymnan 1 myńnan astam qarý tárkilendi

NUR-SULTAN. QazAqparat – Elimizde «Qarý» jedel profılaktıkalyq sharasy aıasynda zańsyz aınalymnan 1 113 qarý jáne 8 myńnan astam patron tárkilendi. Bul týraly QR Іshki ister mınıstrliginiń ókili Shuǵyla Turlybek málim etti, dep habarlaıdy QazAqparat tilshisi.

«Bıyl aqpan aıynan bastap el aýmaǵynda «Qarý» jedel aldyn alý is-sharasy ótip jatyr. Maqsat - qarýdy qoldaný arqyly jasalatyn qylmystardyń aldyn alý. Polıtsııa organdarynda 235 myńǵa jýyq azamattyq qarý ıeleri men 2 myńnan astam qyzmettik qarý sýbektileri esepte tur. Qabyldanǵan sharalardyń nátıjesinde zańsyz aınalymnan 1 113 birlik atys qarýy, sondaı-aq oıyq qarýdyń 8 myńnan astam patrondary tárkilendi», - dedi Shuǵyla Turlybek mınıstrlikte ótken baspasóz máslıhatynda.

Jedel aldyn alý sharasy aıasynda polıtsııa qyzmetkerleri 2,5 myńǵa jýyq zańdy tulǵany, 92 qarý-jaraq satatyn dúken men 76 myńnan astam sharýa qojalyqty tekserdi.

«Sonymen qatar 224 myńnan astam azamattyq qarý ıeleri turǵylyqty jeri boıynsha tekserildi. Nátıjesinde 5 myńnan astam quqyq buzýshylyq anyqtaldy. Qarýdy zańsyz saqtaǵany jáne alyp júrgeni úshin qylmystyq jaýapkershilikti kózdeıtin 379 materıal tirkelip, 579 azamat ákimshilik jaýapkershilikke tartyldy», - deıdi ol.

Sondaı-aq, mınıstlik ókili qarý men oq-dárilerdi zańsyz saqtaǵany úshin qylmystyq jáne ákimshilik jaýapkershiliktiń baryn eske saldy.

«Zańsyz saqtalǵan qarýdy, oq-dárilerdi jáne jarylǵysh zattardy óz erkimen tapsyrǵan adamdar, eger olardyń áreketterinde ózge qylmystar bolmasa, jaýapkershilikten bosatylady. Osyǵan baılanysty ishki ister mınıstrligi azamattardy zańsyz saqtalǵan qarýdy, oq-dárilerdi, jarylǵysh zattardy jáne arnaıy quraldardy óz erkimen tapsyrýǵa shaqyrady», - deıdi ókil.