Qazaqstanda turmystyq qoqystyń 25%-y qaıta óńdeledi

ASTANA. KAZINFORM – Elimizde jyl saıyn 4,5 mln tonnadan astam kommýnaldyq qaldyq jınalady, al olardy qaıta óńdeý deńgeıi ótken jyly 25,8% boldy. Bul týraly QR Ekologııa jáne tabıǵı resýrstar vıtse-mınıstri Mansur Oshýrbaev aıtyp berdi.

− Jaǵdaıdy jaqsartý úshin zamanaýı ınfraqurylym belsendi damyp keledi. Qalalarda qaıta óńdelgen zattar úshin bonýs tóleıtin ekobokstar men fandomattar ornatylyp jatyr. Aı sońyna deıin pılottyq rejımde Astana men Jezqazǵannyń 129 mektebinde qoqysty bólek jınaýǵa arnalǵan 1000-nan astam ekoboks ornatylady. Bul shara polıgonǵa ketetin qoqys kólemin azaıtýǵa yqpal etedi, − dedi M.Oshýrbaev Prezıdent janyndaǵy Ortalyq kommýnıkatsııalar qyzmetinde ótken brıfıngte.

Qaldyqtardy suryptaý men qaıta óndeý úshin ınfraqurylym qurý jumystary da jalǵasyn tapty. Qazir 63 joba maquldandy, bul jyl saıynǵy óńdeý qýatyn 1,1 mln tonnaǵa arttyrýǵa múmkindik beredi.

Onyń ishinde 14 joba 52,4 mlrd teńge qarajat aldy, al 106,9 mlrd teńgege taǵy 23 joba saraptamanyń sońǵy satysynda tur. Birqatar joba iske asyrý kezeńine ótti, keıbiri boıynsha jabdyqtar ornatylyp jatyr.

− Mysaly, Qostanaı oblysynda qatty turmystyq qaldyqtardy suryptaý jáne qurylys qaldyqtaryn qaıta óndeý jobasy qolǵa alyndy. Qazirgi tańda qoqys suryptaý kesheni men jyljymaly usaqtaǵysh satyp alyndy. Joba jyl saıyn 50 myń tonna turmystyq qaldyqty jáne 70 myń tonna qurylys qaldyqtaryn suryptaýdy kózdeıdi, − dedi vıtse-mınıstr.

Eske sala ketsek, «Taza Qazaqstan» aktsııasy aıasynda ótken jyldan beri el boıynsha 1,4 mln tonna qaldyq jınalyp, 2,4 mln aǵash otyrǵyzyldy. Aktsııaǵa shamamen 9 mln adam qatysqan, onyń ishinde 450 myń erikti bar.

Ótken jyly Telegram-da iske qosylǵan @TazaQazBot turǵyndardyń 22 myń shaǵymyn qabyldady, onyń 21 myńnan astamy oryndaldy.