Qazaqstanda týrısterdi saqtandyrý shemasy ózgerýi múmkin

ASTANA. QazAqparat - Parlament Senatynyń Qarjy jáne bıýdjet komıtetiniń keńeıtilgen otyrysynda «Qazaqstan Respýblıkasynyń keıbir zańnamalyq aktilerine saqtandyrý jáne saqtandyrý qyzmeti, baǵaly qaǵazdar naryǵy máseleleri boıynsha ózgerister men tolyqtyrýlar engizý týraly» zań jobasy qaraldy, dep habarlaıdy QazAqparat tilshisi.

Zań jobasy qarjy qyzmetin tutynýshylardyń quqyǵyn qorǵaýdyń tıimdi mehanızmin qurýǵa, qor naryǵyn damytý sharttarymen qamtamasyz etýge, qazirgi zań jobasyn halyqaralyq tájirıbelerge saı keltirýge jáne jetildirýge baǵyttalǵan.

Mańyzdy jańashyldyqtardyń biri retinde onlaın-saqtandyrý júıesin engizýdi atap ótýge bolady. Saqtandyrý salasyn tsıfrlandyrý halyqqa keńsege kelmeı-aq saqtandyrý kompanııalarynyń ınternet-resýrstary arqyly kelisimdi elektrondy formatta jasaýǵa múmkindik bergeli otyr. Aldaǵy ýaqytta deldaldardyń bul iske aralaspaýy saqtandyrý baǵasyn tómendetedi dep kútilýde.

Shetelde demalýdy qolaı kóretin qazaqstandyq týrısterdi qorǵaý maqsatynda olardy saqtandyrýdyń shemasy ózgertilmek. Naqtyraq aıtqanda, týrısterdiń múliktik múddelerin mindetti túrde saqtandyrýǵa kóshý qarastyrylǵan. Týroperatorlarǵa týrısti mindetti túrde saqtandyrý týraly kelisimshartqa otyrǵyzý mindetteledi. Buǵan qosa saqtandyrý uıymyn tańdaý quqyǵy beriledi.

Zań jobasy saqtandyrý qyzmetiniń jańa túrin - júktemeli saqtandyrýdy engizýdi kózdeıdi. Saqtandyrý ombýdsmanynyń laýazymy keńeıtiledi. Halyq pen bıznes úshin saqtandyrý qyzmetiniń qunyn tómendetý jáne ashyqtyqty qamtamasyz etýge baǵyttalǵan shekteýdi qarastyratyn sharalar legi engizilgeli otyr.

Zań jobasy palataǵa joldandy.