Qazaqstanda turǵyn úıdi paıdalanýǵa berý 15% artty

ASTANA. QazAqparat – 2022 jyldyń sońynda Qazaqstannyń turǵyn úı qory 405,2 mln sharshy metr boldy, onyń ishinde 263,9 mln sharshy metr – qalalarǵa, al 141,2 mln sharshy metr – aýyldyq eldi mekenderge tıesili, dep habarlaıdy QazAqparat ranking.kz saıtyna silteme jasap.

Bul rette turǵyn úı qorynyń barlyǵy derlik – 97,7% jekemenshikte, tek 2,3% memlekettik menshikte.

2010-2021 jyldar aralyǵynda turǵyn úıdi paıdalanýǵa berýde turaqty ósim baıqaldy. Belgili bir kezeńderde dınamıka joǵary boldy, keı kezde báseńdedi. Alaıda, 2022 jyly bul kórsetkish alǵash ret tómendedi: bir jylda 7,4% azaıyp, 15,7 mln sharshy metr boldy. Al, osy quldyraýdan keıin bıylǵy alǵashqy bes aıda paıdalanýǵa berilgen turǵyn úılerdiń jalpy aýdany 5,5 mln sharshy metr boldy, bul – 2022 jyldyń qańtar-mamyrymen salystyrǵanda 15,4% kóp. Onyń ishinde 3,1 mln sharshy metri – kóppáterli úıler, 2,3 mln sharshy metri – jeke úıler bar. Turǵyn úıdiń basym bóligi – 5,1 mln sharshy metrin nemese jalpy aýdannyń 93,5%-yn jeke qurylys kompanııalary salǵan.

Óńirler boıynsha bıyl turǵyn úıdi paıdalanýǵa berý boıynsha eń jaqsy kórsetkish Astanada (1,2 mln sh.m), Almatyda (938,7 myń sh.m) jáne Almaty oblysynda (397 myń sh.m) tirkeldi.