Qazaqstanda turatyn búkil ulttardyń bolashaqta memlekettik tilde sóıleýine jaǵdaı jasaldy

NUR-SULTAN. QazAqparat – Qazaqstandyqtardyń 70 paıyzy qazaq tilinde sóıleı alady dep toqmeıilsýge eshkimniń qaqysy joq. Bul týraly Halyqtyń tabysyn arttyrý baǵdarlamasyn tanystyrǵan QR Premer-Mınıstriniń orynbasary Eraly Toǵjanov aıtty, dep habarlaıdy QazAqparat tilshisi.

«Qazaq tiliniń memlekettik til ekenine eshkimniń eshqandaı kúmáni joq. Búginde ózimizdiń ana tilimizde sóıleýge eshqandaı kedergi joq. Úkimet otyrystarynyń bári qazaq tilinde júretinin eldiń bári biledi. Sondyqtan ony ary qaraı damytý ár qazaqtyń qolyndaǵy, moınyndaǵy paryzy desem, artyq aıtqandyq emes dep oılaımyn. Qazir Qazaqstanda turǵyndardyń 70 paıyzy qazaq tilinde sóıleıdi. Biraq, ony ary qaraı damytýymyz kerek. Toqmeıilsip otyrýǵa eshkimniń qaqysy joq. Ásirese, mektep, kolledj, joǵary oqý oryndary deńgeıinde bul máseleni damytýymyz qajet», - dedi Úkimet basshysynyń orynbasary Ortalyq kommýnıkatsııalar qyzmetindegi baspasóz máslıhatynda BAQ ókilderiniń saýalyna oraı.

Onyń dereginshe, elimizdegi mektepterdiń 70 paıyzynan astamy qazaq tilinde sabaq beredi.

«Bul úlken jobalardyń biri. Biraq, bul saıasılandyratyn suraq emes. Til máselesi Mádenıet jáne sport mınıstrliginen Bilim jáne ǵylym mınıstrligine berildi. Bilim salasyna berildi degenimiz, til oqytýdyń naqty ádistemesin jetildire otyryp, árbir qazaq balasyna, qazaqtyń sanasyna sińirý kerek. Qazaqstanda turatyn búkil ulttardyń bolashaqta memlekettik tilde sóıleýine jaǵdaı jasaldy. Biraq, júzege asyrý bárimizdiń moınymyzda», - dedi Eraly Toǵjanov.