Qazaqstanda tsıfrlyq logoped paıda bolýy múmkin

ASTANA.KAZINFORM — Qazaqstanda 1,5-6 jas aralyǵyndaǵy tili kesheýildep shyǵatyn balalarǵa arnalǵan tsıfrlyq platforma iske qosylýy múmkin. Bul týraly Jibek Joly telearnasynyń «Búgin Live» baǵdarlamasynda aıtyldy. 

Mamandardyń pikirinshe, másele ózekti. Álemde balalardyń shamamen 30 paıyzy kesh sóılese, Qazaqstanda árbir tórtinshi balada osyndaı qıyndyq bar. AR SANA jobasy olqylyqtyń ornyn toltyrýdy kózdeıdi.

— Ideıa aldymen «Bolashaq» baǵdarlamasymen Nıý-Iork ýnıversıtetinde oqyp jatqan Aınur Nurádilge kelgen. Onyń 15 jyldyq tájirıbesi bar. Ol sheteldegi bilimin Qazaqstanda damytqysy keledi. Aldymen ata-analarmen baılanystyq, máselelerdi zerttedik. Osylaısha, startapqa kiristik, — deıdi jobanyń menedjeri Nuraı Kınetova.

Foto: vıdeodan alynǵan skrın

Joba aıasynda eki birdeı platforma ázirlengen. Birinshisi — logopedterge arnalǵan AR SANA LAB júıesi. Ol arqyly mamandar balanyń damý dınamıkasyn baqylap, jeke jattyǵýlar usyna alady. Ekinshisi — balalarǵa arnalǵan mobıldi qosymsha. Onda logopedııalyq jattyǵýlar oıyn formatynda usynylyp, balanyń qyzyǵýshylyǵyn arttyrý kózdelgen.

— 17 myńnan astam sóıleý úlgileri bar. Jasandy ıntellekt iske qosylǵan. Anımatsııasyna da uzaq ýaqyt jumsaldy. Sana degen tsıfrlyq logoped bar. Aldaǵy ýaqytta Ámirtaı degen qatarǵa qosylady, — dedi jobanyń ázirleýshisi Samır Haırgeldın.

Jobany aldaǵy ýaqytta ıÝNISEF jáne «Asyl mıras» qorymen birlesip pılottyq rejımde iske qosý josparlanyp otyr. 

— Shymkentte ótken «Digital Qazaqstan — 2026» forýmynda jobaǵa qyzyǵýshylar kóp boldy. Shara aıasyndaǵy baıqaýdan ІІІ oryn alyp, 3 mln teńge qarjylaı júlde aldyq. Investorlar tarapynan usynystar bar. Aldaǵy ýaqytta solarmen jumys isteımiz, — dedi Nuraı Kınetova.

Eske sala keteıik, halyqaralyq jasandy ıntellekt olımpıadasy alǵash ret Qazaqstanda ótedi.