Qazaqstanda tirkelgen 9 negizgi Qytaı marketpleısi bıýdjetke 6 mlrd teńge aýdarǵan
BEIJІŃ. KAZINFORM — Qazaqstan Respýblıkasy Qarjy mınıstrligi Memlekettik kirister komıtetiniń tóraǵasy Jandos Dúısembıevtiń Qytaı Halyq Respýblıkasynyń Memlekettik salyq ákimshiliginiń komıssary Hý Tsınlınmen salyqtyq yntymaqtastyq máseleleri boıynsha kezdesýi ótti.
Qazaqstan men Qytaı strategııalyq áriptestikti nyǵaıtýdy, onyń ishinde salyqtyq yntymaqtastyq sheńberinde – ózara baılanys júıesin jaqsartýdy jáne salyq salý salasynda elektrondyq saýda salasynda járdemdesýdi jalǵastyryp otyr.
– Qytaı men Qazaqstan arasyndaǵy elektrondyq saýdanyń áleýeti zor. Logıstıkany, transshekaralyq saýdany damytý – elderimiz arasyndaǵy áriptestikti odan ári damytý men nyǵaıtýdyń negizgi draıverleri bolady, – delingen habarlamada.
Qazirgi ýaqytta Qazaqstanda 9 negizgi Qytaı marketpleısi tirkeldi, olar Qazaqstan bıýdjetine 6 mlrd. teńgege jýyq tólegen.
Qazaqstan Respýblıkasynda qytaılyq marketpleısterdiń salyq túsimderin ýaqtyly jáne tolyq oryndaýyn qamtamasyz etý maqsatynda eki salyq qyzmetiniń ózara is-qımyly máseleleri talqylandy.
Sondaı-aq, kelissózder barysynda qazaqstandyq munaıdy Qytaıǵa eksporttaý kezinde transferttik baǵa belgileý máselelerine erekshe nazar aýdaryldy.
Atap aıtqanda, «Qazaqstan – Qytaı» magıstraldyq munaı qubyry arqyly shıki munaıdy tasymaldaý kezinde baǵa belgileýdiń ashyqtyǵyn arttyrý jáne salyq táýekelderin tómendetý jónindegi sharalar talqylandy.
Tasymaldaý boıynsha bastapqy qujattamany alý Qazaqstanǵa salyq táýekelderin obektıvti baǵalaýǵa jáne Qytaı Halyq Respýblıkasynda qoldanylatyn tarıfter men baǵa parametrleriniń sáıkestigin qamtamasyz etýge múmkindik beredi.
Kezdesý qorytyndysy boıynsha taraptar elder arasyndaǵy salyq yntymaqtastyǵyn dostyq negizde qurýdy jalǵastyratynyna, al qabyldanǵan sheshimder jan-jaqty ózara is-qımyldyń tıimdiligin arttyrýǵa yqpal etetinine senim bildirdi.
Eske sala keteıik, buǵan deıin aldaǵy ýaqytta elektrondyq saýda salasynda jaýapkershilik onlaın satýshylarǵa ǵana emes, marketpleıs ákimshiligine de júkteletinin jazǵan bolatynbyz.