Qazaqstanda tranzıttik áleýetti damytýǵa qaı jobalar áser etedi
ASTANA. KAZINFORM — Qazaqstanda tranzıttik áleýetti damytý maqsatynda jańa halyqaralyq kólik dálizderin ashý josparlary bar ma? Bul suraqqa Kólik mınıstrligi jaýap berdi.

- Ózen arqyly tasymaldy damytý maqsatynda Ertis transshekaralyq ózenin paıdalana otyryp, «Reseı-Qazaqstan-Qytaı» mýltımodaldy tranzıttik dálizin qurý josparlanǵan. Omby (Reseı) – Zaısan kóli, Tuǵyl kenti (Qazaqstan) ýchaskesinde ózen kóligin, odan ári Qytaıǵa deıin temirjol nemese avtomobıl kóligin paıdalaný qarastyrylǵan. Osy maqsattar úshin Qazaqstan aýmaǵynda Tuǵyl kentiniń aýdanynda kólik-logıstıkalyq ortalyǵy bar ózen portyn jáne 4–shi «Maıqapshaǵaı-Zımunaı» temirjol shekara ótkeliniń ashylýymen «Tuǵyl–Maıqapshaǵaı» jańa temir jolyn salý, sondaı-aq keme jasaý ári keme jóndeý óndirisin jańǵyrtý josparda bar. Jobany iske asyrý kezeńi - 2025–2026 jyldar, - delingen mınıstrliktiń Kazinform agenttigine bergen jaýabynda.
Sonymen qatar eldiń tranzıttik áleýetin arttyrý maqsatynda Transkaspıı halyqaralyq kólik baǵytyna (THKB) kóp kóńil bólinedi. Bul rette, THKB boıyndaǵy Ázerbaıjan, Grýzııa jáne Túrkııa áriptes eldermen máselelerdi sheshý jáne marshrýtty damytý úshin tıisti jumystardy istep jatyr.
Atap aıtqanda, 2023 jylǵy 16 qarashada AHQO bazasynda Qazaqstan, Ázerbaıjan jáne Grýzııa temirjol ákimshilikteri arasynda teńgerimdi negizde baǵdardy paıdalaný boıynsha BKLK-ge uqsas Middle Corridor Multimodal Ltd. birlesken kásiporny quryldy.
Munymen qosa, 2022 jyldan bastap Qazaqstan, Ázerbaıjan, Grýzııa jáne Túrkııa arasynda orta dálizdi 2027 jylǵa deıin damytý jónindegi jol kartasy iske asyrylyp keledi. Onyń sharalary dálizdiń ótkizý qabiletin jylyna 10 mıllıon tonnaǵa deıin ulǵaıtýǵa múmkindik beredi. Bul qujat temirjol ýchaskelerinde naqty sharalar qabyldaýǵa, teńiz ınfraqurylymyn jáne basqa da logıstıkalyq obektilerdi keńeıtýge jaýap beredi.
- Budan bólek, Qytaıdan Eýropaǵa konteınerlik poıyzdardy orta dáliz arqyly jóneltýdiń logıstıkalyq protsesin avtomattandyrý jáne tsıfrlandyrý maqsatynda PSA tobynyń múshesi – «Global DTC» kompanııasy Digital Trade Corridor (DTC) beıtarap mýltımodaldy tsıfrlyq platformasyn ázirledi. Búgingi tańda DTC Qazaqstan, Ázerbaıjan, Grýzııa temirjol júıelerimen ıntegratsııalandy, sondaı-aq Túrkııa, Eýropa temirjol ákimshiligimen kelissózder jalǵasyp jatyr. Osy sharalardyń barlyǵyn tolyq iske asyrý Orta dálizdi halyqaralyq logıstıkanyń jańa deńgeıine shyǵarýǵa kómektesedi, - dep atalyp ótken vedomstvo aqparatynda.
Eske salsaq, jaqynda Úkimette Qazaqstannyń Ortalyq Azııadaǵy negizgi tranzıttik hab retindegi pozıtsııasyn nyǵaıtýǵa baǵyttalǵan jańa jobalar daıyndalatyny aıtyldy.