Qazaqstanda teńgege baılanǵan alǵashqy steıblkoın iske qosyldy

ASTANA. KAZINFORM — Qazaqstan óziniń steıblkoınin iske qosýy eldiń qarjylyq júıesin tsıfrlyq transformatsııalaýdyń mańyzdy qadamy. Bul týraly Ulttyq bank tóraǵasy Tımýr Súleımenov málim etti.

 — Steıblkoın — bul qarjy áleminde ózgeris jasaǵan tólem túri jáne qarjy tetigi. Ony alǵash ret iske qosyp jatyrmyz. Intebix pen Solana jáne Mastercard, sondaı-aq elimizdegi Eýrazııalyq bankpen birlese teńgelik steıblkoınderdi shyǵarý jobasyn iske qosty, — dedi UB basshysy Tımýr Súleımenov. 

Onyń aıtýynsha, steıblkoın krıptovalıýtalardy aıyrbastaýǵa qyzmet etedi jáne krıptokartalar arqyly saýda jasaý úshin qoldanylady. 

 — Teńgege baılanǵan steıblokınniń paıda bolýy el ishindegi ótimdilikti oqshaýlaýǵa, qoldanystaǵy qarjylyq ınfraqurylymmen ıntegratsııaǵa jáne tsıfrlyq aktıvterdiń otandyq júıesin damytýǵa yqpal etedi, — dedi Súleımenov.

Buǵan deıin, krıptoaktıvter, onyń ishinde krıptovalıýtalar, steıblkoınder, tokender jáne blokcheın tehnologııasyna negizdelgen basqa quraldar sońǵy jyldary jahandyq qarjy júıesiniń mańyzdy elementine aınalǵanyn jazǵan edik. Olardyń qarqyndy ósýi men tanymaldyǵynyń artýy bıznes pen ınvestorlar úshin jańa múmkindikterdi, sol sııaqty ulttyq ekonomıkalar úshin mańyzdy táýekelderdi de týyndatady. 

Buǵan deıin Ulttyq bank «steıblkoın» degen ataýmen óz tsıfrlyq aktıvin shyǵarýdy josparlap otyrǵanyn habarlaǵanbyz.