Qazaqstanda telefondardy tirkeý: qansha qurylǵy buǵattaldy

ASTANA. KAZINFORM – Qazaqstanda verıfıkatsııadan ótpegen mobıldi qurylǵylardy buǵattaý protsesi bastaldy. 

Jasandy ıntelekt jáne tsıfrlyq damý mınıstrligi qazirgi ýaqytta 127 682 IMEI-kod buǵattalǵanyn málimdedi. Mamandardyń aıtýynsha, bul san qurylǵylardyń naqty sanyna sáıkes kelmeıdi, sebebi bir smartfonda tórtke deıin IMEI-kod bolýy múmkin.

Smartfondy qaıta qosý úshin paıdalanýshylar verafıkatsııadan ótip, qurylǵynyń elge zańdy túrde ákelingenin rastaıtyn qujattardy belgilengen tártippen usynýy qajet.

Tekserýden keıin mobıldi qurylǵylar úsh tizimge bólinedi:

• «Aq tizim» – sátti verıfıkatsııadan ótken qurylǵylar;

• «Sur tizim» – ýaqytsha tirkelgen, ıeleri 30 kún ishinde qurylǵynyń zańdy ákelingenin rastaýy tıis;

• «Qara tizim» – belgilengen merzimde verıfıkatsııadan ótpegen qurylǵylar.

Qazirgi ýaqytta «sur tizimde» 886 003 IMEI-kod bar.

– Bul san naqty qurylǵylardyń sanyna sáıkes kelmeıdi, sebebi bir qurylǵyda 2-den 4-ke deıin IMEI-kod bolýy múmkin. Sonymen qatar bul kórsetkishke SIM-slottary bar qurylǵylardyń IMEI-kodtary da kiredi. Mundaı jaǵdaıda ıeleri jeńildetilgen tártippen verıfıkatsııaǵa ótinish berýi qajet. Rastalǵan soń, bul IMEI-kodtar «aq tizimge» aýystyrylady, – deıdi Qazaqstandaǵy IMEI verıfıkatsııasy boıynsha ATS MEDIAFON KZ kompanııasy.

Al «Tutynýshylardyń ulttyq lıgasy» uıymynyń málimetinshe, resmı ımport úlesi ótken jylmen salystyrǵanda 20-40 paıyzǵa artqan. Sarapshylar bul kórsetkish engizilgen sharalardyń tıimdiligin dáleldeıdi dep otyr.

Buǵan deıin uıaly baılanys júıesin aınalyp ótetin zańsyz sım-boks qurylǵysy anyqtalǵanyn jazǵanbyz.