Qazaqstanda tek sheteldikterge arnalǵan kazınolar ashylady
ASTANA. KAZINFORM — Týrızm salasyn damytý maqsatynda elimizdiń birqatar óńirinde tek shetel azamattaryna arnalǵan oıyn aımaqtaryn salý múmkindigi boıynsha áleýmettik-ekonomıkalyq zertteý júrgizildi. Jańadan salynatyn oıyn aımaqtary tek sheteldik týrısterge qyzmet kórsetedi. Bul týraly Týrızm jáne sport mınıstrligi málim etti.
Vedomstvonyń málimetinshe, Qazaqstan Respýblıkasynyń azamattaryna atalǵan oıyn zaldaryna kirýge tyıym salynady.
— Álemdik tájirıbe kórsetkendeı, birqatar elde tek sheteldikterge arnalǵan oıyn aımaqtary týrısterdi tartýdyń jáne kýrorttyq ınfraqurylymdy damytýdyń tıimdi tetigine aınalǵan. Mundaı tájirıbe ishki áleýmettik ortaǵa keri áser etpeı, ekonomıkalyq ósimge oń yqpal etedi, — delingen habarlamada.
Zertteý qorytyndysyna sáıkes, Mańǵystaý oblysy turǵyndarynyń 46 paıyzy sheteldikterge arnalǵan kazıno salý bastamasyn qoldaǵan. Ekonomıkalyq boljam boıynsha, 2029 jylǵa qaraı óńirge 148 myń sheteldik týrıst keledi dep kútiledi. Bul 7 myń turaqty jumys ornynyń ashylýyna jáne bıýdjetke 1,2 mlrd teńge salyq túsimin qamtamasyz etýge múmkindik beredi.
— Jetisý oblysynda saýalnamaǵa qatysqandardyń 67 paıyzy kazıno qurylysyna qarsy emes ekenin bildirgen. Boljam boıynsha, 2029 jylǵa qaraı óńir jyl saıyn 36 myńǵa deıin sheteldik týrıst qabyldap, shamamen 700 jańa jumys orny ashylady. Jergilikti bıýdjetke jylyna 2,4 mlrd teńge salyq túsedi dep kútiledi, — dep jazdy vedomstvodan.
Al Almaty oblysynda respondentterdiń 54,5 paıyzy oıyn aımaqtaryn salý bastamasyn qoldaıtynyn atap ótken. Ekonomıkalyq taldaýǵa sáıkes, 2030 jylǵa qaraı óńirge keletin sheteldik týrıster sany 22 810 adamǵa jetedi. Sonymen qatar 2028 jylǵa deıin eki oıyn aımaǵynan 6,5 mlrd teńge salyq túsip, 2 myń turaqty jumys orny ashylady.
Aıta keteıik, oıyn aımaqtaryn belgileý jáne olardyń qyzmeti «Oıyn bıznesi týraly» Qazaqstan Respýblıkasynyń Zańyna sáıkes júzege asyrylady. Aımaqtardyń naqty shekarasyn jergilikti atqarýshy organdar aıqyndaıdy. Al jumys tártibine sáıkes, oıyn oryndaryna tek shetel azamattar ǵana kire alady.
Eske sala keteıik, buǵan deıin Qonaevta jańa kazınolar ashylýy múmkin ekenin jazǵan edik.