Qazaqstanda taǵy bir banktiń depozıt ashýǵa lıtsenzııasy toqtatyldy

ASTANA. QazAqparat - Búginnen bastap «Eksımbank Qazaqstan» AQ-nyń jeke tulǵalardyń depozıtterin qabyldaýǵa, jeke tulǵalardyń bank shottaryn ashýǵa arnalǵan lıtsenzııasy ýaqytsha toqtatyldy, dep habarlaıdy QazAqparat QR Ulttyq bankiniń baspasóz qyzmeti siltememen.

«QR Ulttyq Banki Basqarmasynyń qaýlysymen 2018 jylǵy 29 mamyrdan bastap «Eksımbank Qazaqstan» AQ-nyń jeke tulǵalardyń depozıtterin qabyldaýǵa, jeke tulǵalardyń bank shottaryn ashýǵa arnalǵan lıtsenzııasynyń qoldanylýy 2018 jylǵy 29 tamyzǵa deıingi merzimge toqtatyldy», - delingen habarlamada.

Lıtsenzııa jeke tulǵalardyń jańa depozıtterin tartýǵa jáne jańa bank shottaryn ashýǵa toqtatylǵanymen, banktiń qoldanystaǵy depozıtterine jáne klıentterine qyzmet kórsetýge qatysty emes.

2018 jylǵy 1 mamyrdaǵy jaǵdaı boıynsha, banktiń jeke tulǵalardan qabyldaǵan depozıtteriniń kólemi 267 mln teńgeni quraıdy. Banktiń jeke tulǵalarynyń depozıttik portfeliniń úlesi bank júıesiniń jeke tulǵalar depozıtteriniń jıyntyq kóleminen 0,003% quraıdy.

Buǵan deıin QR Ulttyq bankiniń qaýlysymen «Astana Bankiniń» jeke tulǵalarǵa depozıtter ashýǵa lıtsenzııasy ýaqytsha toqtatylǵanyn habarlaǵan edik.