Qazaqstanda sý qubyry jelileri 43% tozǵan

ASTANA. QazAqparat – Ótken jyly Qazaqstandaǵy aýyz sýdyń 28 myń synamasy tekserildi jáne 3,9%-y normatıvtik talaptarǵa saı kelmegen, dep habarlaıdy QazAqparat tilshisi.

Bul týraly Indýstrııa jáne ınfraqurylymdyq damý mınıstrliginiń Qurylys jáne turǵyn úı-kommýnaldyq sharýashylyǵy isteri komıteti tóraǵasynyń orynbasary Ázimbek Pazylbekuly aıtty.

«Densaýlyq saqtaý mınıstrliginiń aqparatyna sáıkes, 2022 jyly respýblıka boıynsha sanıtarlyq-hımııalyq kórsetkishterge 26 670 synama zertteldi, onyń 1 028 nemese 3,9%-y normatıvtik talaptarǵa sáıkes kelmedi. Mıkrobıologııalyq kórsetkishterge 28 764 synama zerttelse, 1 007 nemese 3%-y sanıtarlyq talaptarǵa sáıkes kelmeıdi», - dedi spıker ortalyq kommýnıkatsııalar qyzmetinde ótken brıfıngide.

Jetkiziletin sý sapasynyń tómendiginiń bir sebebi – sý qubyry júıesiniń tozýy. Jergilikti atqarýshy organdardyń málimetinshe, eldegi sý qubyry jelileriniń jalpy uzyndyǵy 98 myń shaqyrym bolsa, onyń tozý deńgeıi – 43%.

«Osyǵan baılanysty, turǵyndarǵa jaıly ómir jaǵdaılaryn jasaý maqsatynda jańa jelilerdi salýdan basqa, tozǵan jelilerdi qaıta qurý jáne jańǵyrtý jumystary júrgizilip jatyr. Ótken jyly respýblıkalyq bıýdjet qarajaty esebinen 1,8 myń shaqyrymy qaıta jańartyldy», - dedi Á. Pazylbekuly.

Buǵan deıin spıker elde sý tutyný mádenıeti qalyptaspaǵanyn, Qazaqstan Eýropa elderimen salystyrǵanda 3 ese kóp sý jumsaıtynyn aıtqan edi.