Qazaqstanda stýdentterge beriletin grant kóbeımek

ASTANA. QazAqparat – 2024 jyly 180 myń stýdent joǵary stıpendııa alady. Bul týraly Májiliste «2024 – 2026 jyldarǵa arnalǵan respýblıkalyq bıýdjet týraly» zań jobasyn tanystyrý kezinde Qarjy vıtse-mınıstri Abzal Beısenbekuly aıtty, dep habarlaıdy QazAqparat tilshisi.

«Jalpy, elimizde sheteldik joǵary bilimdi alýǵa múmkindik jasaý baǵytynda sheteldik joǵary oqý oryndarynyń fılıaldarynda oqýǵa jyl saıyn

1 700 stýdentti qabyldaý kózdelgen. Sáıkesinshe qarajat qarastyrylǵan. Kadrlardy daıarlaý boıynsha bıylǵa qaraǵanda 2024 jyly 5 myń qosymsha grant berý josparlanǵan, 180 myń stýdent joǵarylatylǵan stıpendııa alady», - dedi A. Beısenbekuly.

Onyń aıtýynsha, 15 myńǵa jýyq stýdentti jataqhanada orynmen qamtamasyz etýge 2024 jylǵa 6 mlrd teńge qarastyrylǵan.

«Sonymen qatar, 4 myń jetim bala men múmkindigi shekteýli adamdarǵa jataqhanalarda turǵany úshin ótemaqy tóleý qarastyrylǵan. Buǵan 2024-2026 jyldarǵa 1,2 mlrd teńge somasynda qarajat bólinbek. Al ǵylymdy qarjylandyrý kólemi aǵymdaǵy jyldyń deńgeıinen 50 paıyzǵa artyp, 242 mlrd teńgeni quraıdy. Bul 616 jetekshi ǵalymnyń eńbekaqysyn ulǵaıtýǵa, irgeli zertteýlermen aınalysatyn 11 ǵylymı zertteý ınstıtýtyn qarjylandyrýmen qamtamasyz etýge múmkindik beredi. Munymen qosa, 720 jas ǵalym álemniń jetekshi ǵylymı ortalyqtarynda taǵylymdamadan ótetin bolady», - dedi vıtse-mınıstr.