Qazaqstanda stýdentterge arnalǵan «Uly dala jastary» jobasy iske qosyldy
Ony «Rýhanı jańǵyrý» baǵdarlamasy basqarý ofısiniń menedjeri Bolat Atybaı QazUTÝ ýnıversıtetinde ótken dóńgelek ústel májilisinde tanystyrdy, dep habarlaıdy QazAqparat tilshisi.
«Tárbıe jáne bilim baǵdarlamasy» úsh baǵyttan turady. Sol úsh baǵyttyń bireýi - sanaly azamat. «Sanaly azamat» baǵytynyń sheńberinde «Uly dala jastary» jobasy ázirlendi. Rýhanı jańǵyrý baǵdarlamasy aıasynda jasalyp jatqan jumystardan joǵary oqý oryndary shet qalǵan bolatyn. Sol JOO-lardy Rýhanı jańǵyrý baǵdarlamasyna qosý úshin osy joba jasaldy. Osy jobadan basqa 21 joba bekitilip barlyq óńirlerge joldandy. Jobanyń maqsaty - elimiz alǵa qoıǵan mindetterdi jastardyń boıyna sińirý», - dedi Bolat Atybaı.
Almaty qalasy boıynsha «Rýhanı jańǵyrý» ofısiniń bas mendjeri Laýra Іrgebaeva «Uly dala jastary» jobasynyń ıdeıasyn Bilim jáne ǵylym mınıstrligi usynyp otyrǵanyn aıtty.
«Negizi bastamashy - QR Bilim jáne ǵylym mınıstrligi. «Uly dala jastary» jobasy qazan aıynan bastaldy. Joba jastardyń belsendiligin arttyrýǵa, ıaǵnı, ǵylym, bıznespen aınalysýyna jaǵdaı jasaý. Oqý ornyn bitirgen jastardyń jumyspen qamtylý deńgeıi tómen. Ne úshin tómen? Osy máseleniń barlyǵy qamtylatyn bolady», - dedi Laýra Іrgebaeva.
Jıynda JOO ustazdaryna joba boıynsha óz oqý oryndaryna yńǵaıly bolatyn usynys jasap, jumys baǵdarlamasyn ázirleý tapsyryldy.
Aıta keter bolsaq, aǵymdaǵy jyldyń 9-shy qazanynda Memleket basshysynyń «Bolashaqqa baǵdar: rýhanı jańǵyrý» baǵdarlamalyq maqalasyn iske asyrý maqsatynda «Uly dala jastary» jobasyn daıyndaý, sondaı-aq jobany júzege asyrýǵa arnalǵan jıyn Respýblıkalyq jobalyq keńse múshesi Bolat Atybaıdyń basshylyǵymen M.Áýezov atyndaǵy OQMÝ-da jıyn ótken bolatyn. Atalmysh jıynda «Tárbıe jáne bilim» kishi baǵdarlamasy talqylanyp, ýnıversıtetter jaýapty bolatyn baǵdarlama Pasporttary jaıynda sóz qozǵalǵan.
Jalpy, Elbasy maqalasynda stýdentterge tolyqqandy bilim berýge jaǵdaı jasaý qajettigi basa aıtylǵan.
«Biz tarıh, saıasattaný, áleýmettaný, fılosofııa, psıhologııa, mádenıettaný jáne fılologııa ǵylymdary boıynsha stýdentterge tolyqqandy bilim berýge qajetti barlyq jaǵdaıdy jasaýǵa tıispiz. Gýmanıtarlyq zııaly qaýym ókilderi elimizdiń joǵary oqý oryndaryndaǵy gýmanıtarlyq kafedralardy qaıta qalpyna keltirý arqyly memlekettiń qoldaýyna ıe bolady. Bizge ınjenerler men dárigerler ǵana emes, qazirgi zamandy jáne bolashaqty tereń túsine alatyn bilimdi adamdar da aýadaı qajet»,- delingen baǵdarlamalyq maqalada.
