Qazaqstanda sottalǵandarǵa qandaı medıtsınalyq kómek kórsetiledi
«Bıylǵy 19 shildede Prezıdent Qasym-Jomart Toqaev «Qazaqstan Respýblıkasynyń Memlekettik basqarý júıesin jetildirý jónindegi sharalar týraly» Jarlyqqa qol qoıdy. Oǵan sáıkes sottalǵandardy medıtsınalyq qamtamasyz etý Іshki ister mınıstrliginen Densaýlyq saqtaý mınıstrligine berilýi tıis. Sottalǵandardy medıtsınalyq qamtamasyz etý fýnktsııalaryn densaýlyq saqtaý organdarynyń qaramaǵyna berý tekserýdiń, dıagnostıkanyń jáne emdeýdiń zamanaýı ádisterine keńinen qol jetkizýge múmkindik beredi», - dedi Janar Shaıdýllına QR ІІM uıymdastyrǵan brıfıngte.
Onyń aıtýynsha qazirgi ýaqytta Qazaqstannyń penıtentsıarlyq mekemeler júıesinde 80 mekeme bar, olardyń 64-i – túrli rejımdegi kolonııalar jáne 16 tergeý ızolıatorlary, onda 34 myńnan astam sottalǵan (24,9 myń) jáne tergeýmen qamaýǵa alynǵan (5,3 myń) adamdar bar.
«Densaýlyq saqtaý jáne medıtsınalyq kómek jáne ómir súrý – ár adamnyń ajyramas quqyǵy bolyp sanalady. Osy maqsatta qoǵamnan oqshaýlaýdyń bastapqy sátinen bastap, bas bostandyǵynan aıyrý jazasyn óteý kezeńinde densaýlyq saqtaýǵa erekshe kóńil bólinedi. Oqshaýlanǵan adamdar medıtsınalyq kómek alý kezinde QR azamattarynyń barlyq quqyqtaryn paıdalanady. Ol densaýlyq saqtaý salasynda bekitilgen standarttarǵa sáıkes usynylady», - dep atap ótti Janar Shaıdýllına.
Spıkerdiń aıtýynsha, emdeý men profılaktıkalyq kómek oqshaýlaý jaǵdaıynda da, azamattyq densaýlyq saqtaý sektorynda da kórsetiledi.
«QAJ mekemelerinde medıtsınalyq kómek «Halyq densaýlyǵy jáne densaýlyq saqtaý júıesi týraly» QR Kodeksine, QR Qylmystyq-atqarý kodeksine, ІІM vedomstvolyq buıryqtaryna jáne tegin medıtsınalyq kómektiń kepildik berilgen kólemi sheńberinde basqa da normatıvtik-quqyqtyq aktilerge sáıkes júzege asyrylady. QAJ mekemelerinde medıtsınalyq kómek kórsetý úshin statsıonarlary bar 65 medıtsınalyq bólim, onyń ishinde 16 – tergeý ızolıatorynda, 6 emdeý-profılaktıkalyq mekemesinde, 3 týberkýlezge qarsy aýrýhanada, sondaı-aq qaýipsizdigi barynsha tómen mekemelerde (qonys-kolonııalarda) 15 densaýlyq pýnktinde jumys isteıdi», - dedi J. Shaıdýllına.
