Qazaqstanda sońǵy 10 jylda balalar ólimi eki ese azaıdy

ALMATY. QazAqparat - Pedıatrııa jáne balalar hırýrgııasy ǵylymı ortalyǵynda «QR pedıatrııalyq qyzmettiń sońǵy 10 jyldaǵy jetistigi» taqyrybynda brıfıng ótti, dep habarlaıdy QazAqparat «Pedıatrııa jáne balalar hırýrgııasy ǵylymı ortalyǵy» baspasóz qyzmetine silteme jasap.

Otyrysta pedıatrııalyq qyzmettiń sońǵy 10 jyldaǵy jetistigi baıan etildi.

Sońǵy 10 jylda balalar ólim-jitiminiń kórsetkishi 2 esege (2017 jyly 1000 nárestege shaqqanda 10,2) jáne náresteler ólim-jitimi 2,6 esege (2017 jyly 1000 nárestege shaqqanda 7,9) tómendedi. Elimizde balalardyń týabitken damý aqaýyn jatyrishinen anyqtap qana qoımaı, sonymen qatar júkti áıelderdi emdeý ádisin júrgizýge múmkindik beretin perınataldyq dıagnostıka jetilip keledi. Týabitti aqaýdan bolatyn 1 jasqa deıingi bala ólimi sońǵy 10 jylda 1,5 esege azaıdy. Bul prenataldy dıagnostıkanyń jaqsarýyna jáne jedel aralasý ádisteriniń jetildirilýine baılanysty.

«Týa bitti aqaýy bar nárestelerdiń 86%-y tiri qalady. Respýblıkada balalar kardıohırýrgııalyq qyzmeti damyp keledi. Qazirgi kezde elde týabitken júrek aqaýy bar balalarǵa arnalǵan 145 kardıohırýrgııalyq tósek-oryn jáne osy naýqastar úshin 28 kardıohırýrgııalyq reanımatsııalyq tósek-oryn uıymdastyrylǵan. Jyl saıyn ashyq júrekke 2000-nan astam ota jasalady, sonyń ishinde 3-4 kúrdelilik deńgeıinde jáne 500-den astam rentgenendovaskýlıarlyq jedel aralasýlar jasalady», - dedi Pedıatrııa ortalyǵy basshysynyń mindetin atqarýshy Janar Saýranbaeva.

Ortalyq basshysynyń pedıatrııa jónindegi orynbasary Gúlnar Abdılovanyń aıtýynsha, qazir balalar onkologııalyq jáne gematologııalyq qyzmetin jetildirý boıynsha jáne balalardaǵy sırek (orfandyq) aýrýlardy dıagnostıkalaý men emdeýdiń jańa standartaryn engizý boıynsha Jol kartasy júzege asyrylýda.

«Qazirgi kezde jiti lımfoblastyq leıkozǵa shaldyqqan balalardyń ómirsheńdigi joǵary mólsherli PHT qoldaný nátıjesinde QR-da 78%-dy quraıdy, ıaǵnı, bul degenimiz álemdik nátıjege jaqyn. Álemdik jetekshi ortalyqtarda osy aýrýǵa shaldyqqan balalardyń ómirsheńdigi búgingi kúni 80-85% bolyp otyr», - dep atap ótti G. Abdılova.

Onyń aıtýynsha, 2013 jyldan beri tyǵyz isikter zamanaýı eýropalyq baǵdarlamamen emdelip keledi.

Biraq emdeýdiń erte taldaý nátıjeleri boıynsha birqatar isik túrlerinen jalpy ómirsheńdik álemdik derekterge jaqyn: QR-da lımfoma kezinde - 80% (álemdik- 83%); baýyr isigi kezinde - 82,4% (álemdik 95%); analyq bez jáne atalyq bez isikteri - 73% (álemdik 75%).

2012 jyldan bastap respýblıkada balalarǵa gemopoezdik ózektik jasýshaǵa 151 transplantatsııalaý jasaldy.

Osy aýrýǵa shaldyqqan balalardy Respýblıkalyq bıýdjet qarajaty esebinen dıagnostıkalaý jáne ferment almastyrý emimen qamtamasyz etý boıynsha máseleler sheshimin tapty.