Qazaqstanda smartfonmen basqarylatyn avtokólikter shyǵarylady

ASTANA. QazAqparat - Bıyl «Azııa Avto» zaýyty smartfonmen basqarýǵa bolatyn avtokólikter shyǵarýdy josparlap otyr. Bul týraly búgin Ortalyq kommýnıkatsııalar qyzmeti alańynda «QazAvtoProm» Qazaqstan avtomobıl salasynyń kásiporyndary odaǵynyń basqarma tóraǵasy Oleg Alferov málim etti.

«Otandyq avtoóndirýshiler engizip jatqan tehnologııalyq sheshimderdiń bir bóligi retinde alǵashqy  toqsanda «connected car», ıaǵnı «iske qosylǵan avtomobıl» jobasy boıynsha jumystardy bastaǵan «Azııa Avto» zaýytyn erekshe atap ótýge bolady. «Sonnected car»tehnologııalary - bolashaq kólik júıesiniń damýyndaǵy negizgi baǵyttardyń biri. Mine, jaqyn arada Óskemen zaýytynan shyqqan avtomobıl ıeleri smartfondaǵy qosymsha arqyly óz kólikterin basqara alady», - dedi Oleg Alferov.

Onyń aıtýynsha, Óskemende qurastyrylatyn ár avtomobılge ornatylatyn telematıkalyq júıeler avtokóliktiń tehnıkalyq jaǵdaıyn jeke smartfon arqyly qashyqtyqtan baqylaýǵa, qozǵaltqyshty iske qosýǵa jáne toqtatýǵa, júksalǵyshty ashýǵa, jyldamdyqty, temperatýrany qadaǵalaýǵa múmkindik beredi. Barlyq jańalyqtar jýyrda qoljetimdi bolady.