Qazaqstanda sırek kezdesetin ań-qustardyń saqtalýyna baǵyttalǵan birde-bir baǵdarlama joq

ASTANA. QazAqparat - Qazaqstanda sırek kezdesetin bıologııalyq túrlerdiń saqtalýyna baǵyttalǵan birde-bir baǵdarlama joq. Bul týraly búgin Astanada «Jasyl ekonomıkaǵa» ekojúıelik qyzmetterdi engizý máselelerine arnalǵan halyqaralyq konferentsııada BUU Damý baǵdarlamasynyń bıoalýandylyq boıynsha menedjeri Talǵat Kerteshev málim etti.

«Ulttyq mindetterdiń biri - sırek kezdesetin jáne joıylýǵa shaq qalǵan bıologııalyq túrlerdi saqtaý. Búginde Qazaqstanda sırek kezdesetin bıologııalyq túrlerdiń saqtalýyna baǵyttalǵan birde-bir baǵdarlama joq. Kıikterdi, bekire tuqymdas balyqtardy qorǵaýǵa arnalǵan bıýdjettik baǵdarlamalar bar, biraq olar tolyqqandy baǵdarlama emes, ol tek osy túrlerdi qorǵaýǵa arnalǵan. Qalǵandary nazardan tys qalyp jatyr», - dedi T. Kerteshev.

Onyń aıtýyna qaraǵanda, eger memleket tabıǵatta sırek kezdesetin túrlerdi saqtaýǵa keshendi túrde atsalyspasa, olardan aıyrylyp qalýymyz yqtımal.

«Sondyqtan, jańa strategııanyń aıasynda biz sırek kezdesetin 17 túr boıynsha baǵdarlama jasaýdy usynamyz. Onyń sheńberinde tıisti jaǵdaılar qarastyrylýy shart. Máselen, janýarlardyń erkin kóshýi úshin jol ótkelderin salý óte qajet. Elde iri-iri magıstraldar, temirjol jelileri salynýda. Alaıda, elde kıikterdiń, qulandardyń, ózge de janýarlardyń dala kezýine qajetti ótkelder joq. 2030 jylǵa qaraı 10 ótkel salý josparyn qoıýymyz tıis. Bul aldymen janýarlardyń brakonerlerden saqtanýyna kerek shara», - dep atap ótti ol.

Aıta keteıik, konferentsııaǵa Vetnam, Túrkimenstan, Reseı, Mońǵolııa, Qyrǵyzstan, AQSh jáne Germanııa mamandary qatysýda.