Qazaqstanda syra ónimderiniń aınalymy tolyq qadaǵalaýǵa alynady
ASTANA. KAZINFORM — 2026 jylǵy 1 aqpannan bastap Qazaqstanda Saýda jáne ıntegratsııa mınıstrliginiń buıryǵyna sáıkes syra qaınatý ónimderin tsıfrlyq tańbalaý kezeń-kezeńimen engizý bastalady. Bul týraly Memlekettik kirister komıtetiniń baspasóz qyzmeti habarlaıdy.
Tańbalaý naryqtyń barlyq qatysýshysy aldyn ala daıyndalyp, jańa jaǵdaılarda jumysty uıymdastyra alýy úshin birizdi ári kezeń-kezeńimen engiziledi:
- 2026 jylǵy 1 aqpannan bastap — kegalar men bótelkelerdegi syrany tańbalaý;
- 2027 jylǵy 1 qańtardan bastap — qańyltyr bankilerdegi syrany tańbalaý;
- 2027 jylǵy 1 qańtardan bastap — taýar aınalymynyń búkil tizbegi boıynsha tolyq qadaǵalaý rejımine kóshý.
Bul rette tańbalaýǵa tek 2026 jylǵy 1 aqpannan bastap óndirilgen ónim jatady. Osy kúnge deıin óndirilgen syra qaınatý ónimderi bir jyl ishinde qosymsha tańbalaýsyz satylýy múmkin.
Syra óndirýshiler, ımporttaýshylar jáne bólshek saýda satýshylary tańbalaý júıesine biryńǵaı tsıfrlyq servıs arqyly qosylady. Tirkeý myna silteme boıynsha qoljetimdi.
Tańbalanǵan syrany nemese syra sýsynyn bólshek saýdada ótkizý kezinde taýardy aınalymnan shyǵarý fıskaldyq derekter operatorynan túsetin málimetter negizinde avtomatty túrde júzege asyrylady. Bul úshin saýda núkteleriniń kúndelikti qyzmetinde paıdalanylatyn baqylaý-kassalyq mashına qoldanylady.
Quıma syrany (kegalarda) satý kezinde aınalymnan shyǵarý fıskaldyq derekter operatorynan alynǵan alǵashqy málimetter negizinde júzege asyrylady jáne búkil kegaǵa qatysty júrgiziledi.
— Tsıfrlyq tańbalaý ónim aınalymynyń ashyqtyǵyn qamtamasyz etýge jáne adal naryq qatysýshylaryn qorǵaýǵa múmkindik beredi. Júıe syra ónimderin óndirý, saqtaý jáne ótkizý protsesteri túsinikti ári úırenshikti bolyp qala otyryp, zamanaýı tsıfrlyq sheshimdermen tolyqtyrylatyndaı etip qurylǵan, — dep atap ótti komıtet.
Memlekettik kirister organdary óndirýshiler men ımporttaýshylardy bul talaptarǵa aldyn ala daıyndalýǵa, tańbalaý protsesin bıznes júıesine engizýge jáne belgilengen merzimde talaptardy oryndaýǵa shaqyrady.