Qazaqstanda shyryn men lımonad baǵasy qansha
Jaz aılarynda qazaqstandyqtar shól basatyn sýsyndy jıi tutynady. Kazinform tilshisi elimizdiń óńirlerindegi shyryn men lımonad baǵasyn salystyryp kórdi.
Taldaý jasaý kezinde shyryn, gazdalǵan sýsyn men lımonad qunynyń qanshadan ekenin salystyrdyq. Baǵa aıyrmashylyǵy qandaı? Qaı óńirde arzan, al qaı óńirde qymbat ekeni salystyrý kezinde anyqtaldy.
Eń arzan shyryndy Almaty qalasynan satyp alýǵa bolady. Munda bir lıtr shyryn quny 539 teńge turady. Al Túrkistan (550tg), Oral (572-718 tg) jáne Atyraýda (580 tg) baǵa sál joǵary. Qyzylordada bir lıtr shyryn quny 600 teńge bolyp tur. Al Kókshetaýda — 620 — 765 tg, Qostanaıda — 630 tg, Aqtóbede — 655-743 tg, Qaraǵandyda — 685 tg jáne Tarazda — 695-709 tg. Bul elimizdegi shyryn baǵasy ortasha óńirler. Al Jezqazǵanda 1 lıtrlik shyryn quny 705 tg, Petropavlda- 725-745 tg, Shymkente — 760 tg jáne Pavlodarda — 780 tg. Eń qymbaty Óskemen men Semeıde. Munda shyryn quny — 810 teńge.
Aıtyp óteıik, tabıǵı shyryn baǵasy elimizde joǵary bolyp tur. Sol sebepti óndirýshiler aragidik aktsııa ótkizip, jeńildik jasaıdy. Sol kezde baǵa 5-10% tómendeıdi.
Kelesi kezekte jastar jıi tutynatyn gazdalǵan sýsyn baǵasy. Kópshiligi gazdalǵan sýsyn dáminen esh ózgeshelik baıqamaıdy. Alaıda keıbiri aty bir, zaty uqsas bolǵanymen ózi ǵana jaqsy kóretin gazdalǵan sýsyndy tutynǵandy jón kóredi. Bir lıtrlik gazdalǵan sýsyn Qyzylorda men Almaty qalalarynda arzan. Munda baǵa — 500 teńge. Al Shymkentte — 520 tg, Petropavlda — 525 tg, Aqtóbe men Oralda — 528 tg. Óskemen men Semeıdi baǵa ortasha. Munda 1 lıtrlik gazdalǵan sýsyn 546 tg turady. Atyraýda - 550 tg, Tarazda — 557 tg, Qaraǵandyda — 565 tg jáne Jezqazǵanda — 585 tg. Elimizde eń qymbat gazdalǵan sýsyn tórt qalada satylady. Qazir Túrkistanda — 600 tg, Qostanaıda — 601 tg, Kókshetaýda — 606 tg jáne Pavlodarda — 630 tg.
Sonymen birge lımonad baǵasyn da bildik. Eń arzany eki qalada tirkeldi. Atyraýda — 220 tg jáne Oralda — 284 tg. Qazirgi kezde Túrkistanda — 300-450 tg, Petropavlda — 320- 400 tg, Almatyda — 325 — 551, Qyzylordada — 350 — 400 tg jáne Qostanaıda — 376-540 tg. Al Jelqazǵan men Tarazda baǵa 400 teńgeden bastalady. Kókshetaýda bir lıtrlik lımonad quny 450 teńge bolyp tur. Shymkent pen Qaraǵandyda baǵa sál joǵary. 1 lıtr lımonad quny — 470 tg. Óskemen men Semeıde — 547 tg, al Aqtóbede — 562 tg. Eń qymbat lımonad Pavlodar qalasynda satylady. Bul óńirde lıtri — 680 tg.
Aıta keteıik, gazdalǵan sýsyndar baǵasy onyń shyny ydysqa, plastıkke nemese qańyltyrǵa quıylǵanyna da baılanysty. Plastık ydystaǵy sýsyn baǵasy álbette arzan bolady. Máselen Shymkentte plastıka ydystaǵy 1 lıtr sýsyn 520 teńge. Al kólemi 0,25 l bolatyn shyny ydystaǵy sýsyn 430 teńgege satylady. Kólemi 0,33 l bolatyn qańyltyr ydysqa quıylǵan sýsyn 690 teńgege satylady.
Buǵan deıin Qazaqstandaǵy shaı men kofe baǵasy týraly jazyldy.