Qazaqstanda saıabaqtaǵy attraktsıonda kóńil kóterý baǵasy qansha
ASTANA. KAZINFORM — Sońǵy qońyraý soqqan soń ata-analardyń kóbi balalaryn qaladaǵy kóńil kóterý oryndaryna, saıabaqtarǵa aparady. Kazinform agenttiginiń tilshisi attraktsıondardaǵy bılet baǵasyn bildi.
Baǵany satystyrǵan kezde ashyq aspan astynda, ıaǵnı, ortalyq saıabaqtarda turǵan attaraktsıon qyzmetiniń qunyn bildik. Sonyń ishinde jeke saıabaqtardy nazarǵa aldyq. Bir balaǵa qajetti qarjy esepteldi. Oǵan sholý dóńgelegi, shaǵyn parovoz jáne batýt kiredi. Alaıda mundaı attraktsıon keıbirinde múlde joq.
Bárinen de baǵa Jezqazǵan qalasynda tómen. Orta eseppen munda 1 000 — 2 500 teńge kerek. Biraq bir ókinish bar. Munda sholý dóńgelegi múlde joq, átkenshekter tabylmady. Tek úrmeli batýt qyzmetiniń qunyn bildik.
Odan ári Semeı qalasy tur. Munda bir adamǵa arnalǵan bılet baǵasy 1 000 — 1 800 teńge aralyǵynda. Bul qalada da sholý dóńgelegi joq, tek shaǵyn paravoz ben batýt bar. Olarda bılet baǵasy 500 teńgeden bastalady.
Túrkistan men Qyzylorda qalalarynda úsh attraktsıonnyń árqaısysynyń quny 1 500 teńge. Eki qaladan da túrli átkenshek tabyldy. Sholý dóńgeleginiń baǵasy 500 — 600 teńge. Al parovozǵa miný quny 300 — 400 teńge bolsa, eń qymbaty batýt. Baǵasy 500 — 1000 teńge.
Qaraǵandylyq ata-analar balalardy saıabaqqa aparyp, qydyrtsa 1 800 — 3 500 teńge jumsaıdy. Munda batýtta sekirip oınaý qymbat. Bir seansy 1 000 — 2 500 teńge. Aıta keteıik, Qazaqstandaǵy batýttarǵa 10 mınýtqa ǵana kiredi. Sonymen birge qalaǵanynsha oınap, sekirýge bolatyn qyzmet túri de bar.
Taraz saıabaǵyndaǵy qyzmet bir balaǵa 1 900 — 2 400 teńge bolady. Munda sholý dóńgelegine 800 teńge, pavorozǵa 600 teńge, batýtqa 500 — 1 000 teńge tóleıdi.
Taldyqorǵan, Petropavl men Atyraý qalalarynda kóńil kóterýge 2 000 teńge jáne odan da mol aqsha kerek. Árıne ár qalada ártúrli. Máselen Taldyqorǵanda sholý dóńgelegine minip, bir aınalyp kelse 1 000 teńge, al Petropavlda batýt 700 teńge jáne odan qymbat.
Odan ári Aqtóbe qalasy tur. Munda úsh atraktsıondy tańdasańyz bir balaǵa 2 200 — 3 200 teńge tóleýge týra keledi.
Shymkentte sholý dóńgeleginiń bılet quny 1 000 teńge, batýtta sekirse 500 — 1 000 teńge, al parovozǵa minse 800 teńge bolady. Qoryta kele ár balaǵa kem degende 2 300 — 2 800 teńge tóleıdi.
Astana men Oral qalalarynda úsh attraktsıonnyń bılet quny 2 500 teńgeden bastalady. Sonyń ishinde Oraldaǵy baǵa elorda qaraǵanda tómen. Máselen Astana qalasynda eki sholý dóńgelegi bar. Bireýinde bılet baǵasy — 4 000 teńge.
Kókshetaý men Aqtaý qalalarynda baǵa shamalas. Tek batýtta sekirý baǵasy ártúrli. Eki qalada da sholý dóńgeleginiń bıleti 1 000 teńge bolsa, parovoz 800 teńge. Jalpy ár balaǵa kem degende 2 600 teńge jumsaıdy.
Odan ári Pavlodar men Qostanaı qalalary tur. Munda baǵa 2 700 teńgeden bastalady. Sonyń ishinde Pavlodar qalasynda sholý dóńgeleginiń quny 700 teńge, al Aqtaýda 1 000 teńge.
Almaty, Óskemen qalalarynda bir balaǵa kem degende 3 600 teńge jumsaýǵa týra keledi. Óskemen qalasynda bir jerden ekinshi saıabaqqa barýdyń qajeti joq. Al Almaty qalasynda saıabaq ta, tańdaý da kóp. Keıbirinde sholý dóńgeleginiń bıleti, ekinshisinde parovoz baǵasy tómen.
Buǵan deıin velosıped pen samokatty jalǵa alý quny týraly jazyldy.
