Qazaqstanda satylǵan jańa kólikterdiń reıtıngi jasaldy

NUR-SULTAN. QazAqparat – 2020 jyldyń qańtar-qazan aılary aralyǵynda Qazaqstanda resmı dılerler 70 myńnan astam jańa kólik satty.

Bul týraly QazAqparat «QazAvtoÓnerkásip» avtokólik salasyndaǵy kásiporyndar odaǵyna silteme jasap habarlaıdy.

«Atalǵan kezeńde resmı dılerler 70 549 kólikti satty. Bul bir jyl burynǵy kórsetkishten 25,9 paıyzǵa joǵary. Bıylǵy 10 aıda qazaqstandyqtar jańa jeńil kólikterdi alýǵa 633,6 mlrd teńge jumsap, 2019 jylǵy deńgeıden 21,3 paıyzǵa artyq boldy», - delingen taratylǵan málimette.

Kólik satyp alýshy 50 425 adam (71,5 paıyzy) otandyq zaýyttardyń ónimine óz tańdaýyn jasaǵan. Sonymen qatar, bıylǵy 10 aıda satylǵan 20 124 avtomobıl (28,5 paıyzy) ımportqa tıesili bolyp otyr.

Atalǵan merzimde elimizde suranysy joǵary brendterdiń arasynda Lada (15 219 kólik), Hyundai (13 456), Toyota (8 612 ), Ravon (6 906 ) jáne Chevrolet (5 667) kólikteri kósh bastady.

Munymen qosa, satylymy joǵary bolǵan TOR-ondyqta – KIA (5 060 kólik), GAZ (2 360), Renault (2 172 ), Volkswagen (1 985 ) jáne Nissan (1 852) bar.