Qazaqstanda sábı ólimi 11 paıyzǵa tómendedi
Kóp jaǵdaıda sábı ólimine perınataldyq kezeńniń asqynýy sebep bolady. Sonymen birge, 1 jasqa deıingi balalar damýdyń týabitti aqaýlary, tynys alý jáne qan aınalym organdarynyń syrqattanýy sebepti de qaıtys bolady.
Respýblıkada kún saıyn 1 myńnan astam, jyl saıyn 400 myńnan asa sábı dúnıege keledi. Týý kórsetkishi sońǵy 5 jylda 3%-ǵa ósti. Elimizde sábı ólimin azaıtýǵa baǵyttalǵan sharalardyń nátıjesinde salmaǵy 500 gramm jáne odan asatyn shala týǵan balalar ómir súrýge múmkindik aldy. 5 jylda salmaǵy 1500 grammǵa deıingi sanattaǵy balalardyń tirshilikke qabilettiligi 30%-ǵa ósip, 60%-ǵa jýyq kórsetkishti qurap otyr.
Dúnıejúzilik densaýlyq saqtaý uıymy usynǵan tiri týý men óli týý ólshemderin engizýdi esepke ala otyryp elimizde statsıonarlyq qyzmetti, tájirıbege únemdi, qoljetimdi, qarapaıym, halyqaralyq tehnologııalardyń dáleldi medıtsınasyna negizdelgen tıimdi perınataldy kútimdi, balalyq jas aýrýlardy biriktirip qarastyrýdy nyǵaıtý men jetildirý sharalary bastaldy.
Elimizdiń barlyq óńirlerinde tıimdi perınataldy kómekti engizý boıynsha oqytý ortalyqtary jumys isteýde.
Perınataldy kómek kórsetýde biregeı tásilderdi qoldanýdy qamtamasyz etý maqsatynda 300-den astam emhanalyq hattamalar halyqaralyq standarttarǵa sáıkestendirilip, bekitildi, sonymen birge, medıtsınalyq qyzmetkerler oqytylyp, medıtsınalyq JOO-da oqý jáne jumys baǵdarlamalary ózgertildi.
Damýdyń týabitti kemistikterin ýaqytyly anyqtaý úshin genetıkalyq jáne ýltradybystyq skrınıng jasalady. Perzenthana deńgeıinde nárestelerdiń estý qabileti kemistikterin anyqtaý boıynsha skrınıng engizilgen.
Týabitti júrek-qantamyrlar júıesi kemistigin túzetý boıynsha túbegeıli hırýrgııalyq otalar sátti júzege asyrylyp keledi. Búginde Astana jáne Almaty qalalaryndaǵy ǵylymı ortalyqtarda nárestelerge «ashyq júrekke» ota jasalýda, sonymen qatar, júrek kemistigin ınterventsıaldy, az ınvazıvti tásldermen túzetý sharalary iske asyrylýda.
Aıta ketý kerek, ana men sábı densaýlyǵy elimizdiń demografııalyq, ekonomıkalyq, eńbek, áleýmettik, mádenı jáne qorǵanys áleýetiniń negizin qalyptastyrady. Sondyqtan ja, ana men bala densaýlyǵyn qorǵaý - respýblıkadaǵy densaýlyq saqtaý júıesiniń basym baǵyttarynyń biri bolyp tabylady.
Esterińizge sala keteıik, Densaýlyq saqtaý salasyn damytýdyń 2016-2019 jj. arnalǵan «Densaýlyq» memlekettik baǵdarlamasyn júzege asyrý aıasynda Qazaqstanda negizgi áleýmettik máni bar, eldiń demografııalyq ahýalyna aıtarlyqtaı áseri bar 5 negizgi nozologııa (mıokardtyń jiti ınfarkti, mıdaǵy qan aınalymynyń aýyr aýytqýlary (ınsýlt), qaterli isik aýrýlary, synyqtar, júktilik jáne bosandyrý) boıynsha medıtsınalyq kómek kórsetýdiń biriktirilgen úlgisi kezeń kezeńimen engizilip keledi.