Qazaqstanda psıholog qyzmeti qansha turady
ASTANA. KAZINFORM - Qazaqstan qalalarynda psıhologtiń qabyldaýyna jazylý quny bir-birinen alshaq. Keıde 4 myń teńgeden bastalyp, 100 myń teńgege deıin jetedi.
Psıholog
Óńirlerdegi qalalardyń ishinde Petropavl men Taldyqorǵanda baǵa qoljetimdi. Munda psıhologtyń bir saǵattyq seansy 4 myń teńge dep belgilengen.
Al eń joǵary baǵa Astana qalasynda tirkeldi. Elordada keńes alý quny 10 myń teńgeden bastalyp 100 myń teńgege deıin jetedi.
Elimiz boıynsha ortasha baǵa 8 000 – 35 000 teńge aralyǵynda. Degenmen iri megapolısterde, halyqaralyq dárejede tájirıbesi bar mamandar qabyldaýynda baǵa birneshe ese joǵary.
Psıhoterapevt
Psıhoterapevt mamanynyń arnaıy medıtsınalyq lıtsenzııasy bolýy tıis jáne tájirıbeli mamannyń qabyldaýy ádettegideı qymbat.
Atyraý men Shymkentte baǵa arzan. Qabyldaý quny 5 myń teńgeden bastalady. Keńes berý elimiz boıynsha Almatyda qymbat. Munda bir saǵattyń seansy 50 myń teńgege deıin jetedi. Al Astana qalasynda 45 myń teńgege deıin barady.
Qazaqstan boıynsha psıhoterapevttiń bir saǵattyq qyzmeti orta eseppen 12 000 – 30 000 teńge aralyǵynda.
Sarapshylardyń aıtýynsha, psıholog pen psıhoterapevttiń qyzmet aqysy jyl saıyn kóterilip keledi. Qazaqstandyqtar tek basyna is túskende, kúızeliske ushyraǵanda ǵana emes, sher tarqatýǵa, óz-ózin damytýǵa da maman kómegine júginedi.
Baǵanyń ósýine jeke psıhoterapevtter sanynyń kóbeıýi, onlaın keńes pen halyqaralyq ádisti engizý joly áser etip tur. Degenmen óńirlerde toptyq keńes berý, mektep jáne ujymdyq psıhologtar qyzmeti de bar. Oǵan onlaın qyzmetti de qosýǵa bolady. Bul baǵany turaqty ustap turýǵa septigin tıgizedi.
Buǵan deıin Psıhologııalyq qoldaý ortalyǵynan 20 myńnan astam qazaqstandyqtyń kómek alǵany týraly aıtyldy.