Qazaqstanda plastıkalyq operatsııa jasaıtyn 262 klınıka bar

ALMATY. KAZINFORM — Densaýlyq saqtaý mınıstrligi Kazinform saýalyna joldaǵan jaýapta plastıkalyq operatsııa jasaýǵa lıtsenzııa jeke medıtsınalyq praktıkamen aınalysatyn zańdy jáne jeke tulǵalarǵa beriletinin málim etti.

Densaýlyq saqtaý mınıstrligi azamattardyń ómiri men densaýlyǵynyń qaýipsizdigin qamtamasyz etý maqsatynda medıtsınalyq qyzmetke birqatar talap qoıady, negizgi talaptyń biri — medıtsınalyq qyzmetti mindetti lıtsenzııalaý.

— Bul - medıtsınalyq qyzmet halyq úshin óte mańyzdy, sonymen birge oǵan úlken jaýapkershilik júktelgen. Plastıkalyq hırýrgııamen aınalysý úshin birinshi kezekte lıtsenzııa bolýy shart. Lıtsenzııa men oǵan qosymshany medıtsınalyq jáne farmatsevtıkalyq baqylaý komıtetiniń aýmaqtyq departamentteri lıtsenzıattyń ornalasqan jeri boıynsha beredi, — delingen jaýapta.

Ony alý úshin myna biliktilik talaptaryna saı bolý qajet:

• sanıtarııalyq qaǵıdalarǵa sáıkes keletin bólme. Lıtsenzııany (oǵan qosymshany) alǵanǵa deıin sanıtarııalyq — epıdemıologııalyq qorytyndysy bolýy qajet;
• mamandar: tıisti mamandyq boıynsha sertıfıkatyń bolýy;
• málimdelgen medıtsınalyq qyzmettiń kishi túrleri boıynsha sońǵy 5 jylda biliktilikti arttyrý;
• medıtsınalyq ońaltýdy kórsetýdi uıymdastyrý standartyna sáıkes jumys istep turǵan medıtsınalyq jáne (nemese) arnaıy jabdyqtardy, 
  kólik jáne basqa da quraldardy qamtıdy.
• nysan (óndiristik baza) sanıtarlyq erejelerge sáıkes bolýy kerek;
• dara kásipkerler úshin medıtsınalyq qyzmettiń málimdelgen kishi túrleri boıynsha jumys ótili keminde 5 jyl bolýy tıis.

«Ulttyq aqparattyq tehnologııalar» AQ usynǵan málimetke sensek, Qazaqstanda 3 416 emdeý mekemesi hırýrgııalyq medıtsınalyq qyzmet kórsetedi, onyń ishinde 262-si plastıkalyq hırýrgııa qyzmetin usynady.

Osyǵan deıin Densaýlyq saqtaý mınıstrligi tıisti sertıfıkattar men lıtsenzııasyz plastıkalyq ota jasaǵan mekemeniń zań aldyndaǵy jazasy qandaı bolatynyn túsindirgen edi. 

Sondaı-aq plastıkalyq hırýrg Gúlmıra Qoblandına sulýlyq salonynda plastıkalyq operatsııa jasaıtyndardyń kóbeıgenin aıtty. 

Eske salaıyq, byltyr Almatyda artyq salmaqtan arylý úshin lıposaktsııa jasatqan áıel kóz jumdy. 

Budan bólek, 2018 jáne 2020 jyldary Almatyda artyq maıdan arylǵysy kelgen eki áıel ajal qushqan edi.