Qazaqstanda ózge tilderge qatysty úreı bar degen sózge narazymyn – Maksım Rojın
«Búginde elimizde memleket tarapynan kez kelgen etnosqa óziniń tilin, óziniń mádenıetin bilýge barlyq jaǵdaılar jasalǵan. Onyń bir dáleli, elimizde orys, ózbek, aǵylshyn, nemis tilinde jumys isteıtin orta mektepter bar. Álemde memlekettik bıýdjet qarjysynan balalardy týǵan tilinde oqytýǵa aqsha bóletin elder saýsaqpen sanarlyq shyǵar. Meniń oıymsha, Qazaqstan – sondaı memleketterdiń biri. Oǵan bizdegi orys tilinde, aǵylshyn tilinde, nemis, ózbek tilderinde bilim beretin mektepter mysal bola alady.
Sondyqtan men sheteldik saıasatkerlerdiń Qazaqstanda orys tiline jáne ózge de tilderge qatysty úreı bar degen ýájderin narazylyqpen qabyldaımyn. Men tegi orys qazaqstandyq retinde ondaı replıkalarǵa jol joq dep esepteımin. Bul elimizdegi shynaıy kórinisti burmalap kórsetý ekenine senimdimin», - dedi ol Qazaqstan halqy Assambleıasynyń HHHІ sessııasynda.
Sondaı-aq, ol halyqtyń memlekettik tilge bet burǵanyn, osy tendentsııadan memlekettik qyzmetshiler de qalyspaýy kerektigin atap ótti.
«Biz qazir Halyqaralyq qazaq tili qoǵamy arqyly tilge arnalǵan Kórneki jobany bastap jatyrmyz. Bul joba kórneki aqparat týraly zańynyń talaptaryn shaǵyn jáne orta bızneske túsindirip, oryndaýǵa erikti túrde kómektesedi. Qoǵam qazaq tiline kóship jatqanda bul talap memlekettik qyzmetkerler úshin de kúsheıýi kerek dep sanaımyn. Sebebi qazaq tili qazir qoǵamnyń negizgi tiline aınalyp keledi. Bul – halyqtyń talaby. Sondyqtan memlekettik qyzmetshiler qazaq tilinen tapsyratyn emtıhan nátıjesi eseptelýi kerek dep esepteımin», - dedi Maksım Rojın.
Aıta keteıik, Assambleıanyń bul jolǵy jıyny «El birligi – jańarǵan Qazaqstannyń tiregi» kún tártibimen ótedi .
