Qazaqstanda ótken aptada bolǵan kadrlyq taǵaıyndaýlar
ASTANA. KAZINFORM – Elimizde ótken aptada birqatar kadrlyq aýys-túıis boldy. 6 mamyrda Jaslan Mádıev Tsıfrlyq damý, ınnovatsııalar jáne aeroǵarysh ónerkásibi mınıstri laýazymyna taǵaıyndaldy.
«Memleket basshysynyń Jarlyǵymen Jaslan Hasenuly Mádıev Qazaqstan Respýblıkasynyń Tsıfrlyq damý, ınnovatsııalar jáne aeroǵarysh ónerkásibi mınıstri laýazymyna taǵaıyndaldy», - dep habarlady Aqordanyń baspasóz qyzmeti.
Jaslan Mádıev 1983 jyly Almaty qalasynda dúnıege kelgen.
Ál-Farabı atyndaǵy Qazaq ulttyq ýnıversıtetin, Kolýmbııa ýnıversıtetin, Massachýsets tehnologııalyq ınstıtýtyn támamdaǵan.
Eńbek jolyn 2004 jyly «Alıans Bank» AQ Halyqaralyq qatynastar departamentiniń Halyqaralyq qarjy ınstıtýttarymen jumys basqarmasynyń mamany bolyp bastaǵan.
2007-2008 jyldary — «Qazyna» turaqty damý qory» AQ korporatıvtik qarjylandyrý departamentiniń bas menedjeri.
2008 jyly Qazaqstan Respýblıkasy Prezıdenti Ákimshiliginiń Strategııalyq taldaý jáne zertteýler ortalyǵynda, «Samuryq-Qazyna» ulttyq ál-aýqat qory» AQ-da jumys istedi.
2009-2010 jyldary — «KAZYNA CAPITAL MANAGEMENT» AQ basqarma tóraǵasynyń orynbasary.
2010-2014 jyldary — «Qazaqstannyń damý banki» AQ basqarýshy dırektory-múshesi, basqarma tóraǵasynyń orynbasary.
2014-2015 jyldary QR Ulttyq bankiniń qurylymynda basshylyq laýazymdardy atqardy.
2017-2018 jyldary — «Qazaqstan temir joly» ulttyq kompanııasy» AQ vıtse-prezıdentiniń mindetin atqarýshy, qarjy jónindegi vıtse-prezıdenti.
2018 jyly «Qazaqstan temir joly» ulttyq kompanııasy» AQ qarjy jónindegi basqarma tóraǵasy bolyp taǵaıyndaldy.
2019-2020 jyldary — Qazaqstan Respýblıkasynyń Ulttyq ekonomıka vıtse-mınıstri.
2020 jylǵy qazannan bastap 2022 jyldyń qańtaryna deıin Qazaqstan Respýblıkasynyń Strategııalyq josparlaý jáne reformalar jónindegi agenttigi tóraǵasynyń orynbasary qyzmetin atqardy.
10 mamyrda jańadan qurylǵan Alataý qalasynyń ákim qyzmetine Arken Ótenov taǵaıyndaldy.
Arken Ótenov 1983 jyly 15 qarashada Almaty qalasynda dúnıege kelgen. Ol Ál-Farabı atyndaǵy Qazaq ulttyq ýnıversıteti jáne Karnegı Mellon ýnıversıtetinde (Bolashaq baǵdarlamasynyń túlegi, 2010 jyl) bilim alǵan.
Halyqaralyq qatynastar mamany, ekonomıst jáne memlekettik saıasat salasyndaǵy ǵylym magıstri, Prezıdenttiń jas talanttar pýlynyń múshesi.
Arken Ótenov elimizdiń bank sektorynda, sondaı-aq memlekettik organdarda túrli laýazymdarda, sonyń ishinde Qazaqstan Respýblıkasy Prezıdentiniń Ákimshiligi men Qazaqstan Respýblıkasy Qarjy mınıstrliginde, Syrtqy ister mınıstrliginde jumys atqarǵan.
Juma kúni qandasymyz Muqııat Jarmuqametuly Shyńjań-Uıǵyr avtonomııalyq aýdany Halyq úkimeti tóraǵasynyń orynbasary qyzmetine taǵaıyndaldy.
Tıan-Shan portalynyń habarlaýynsha, 8 mamyr kúni Úrimjide Shyńjań-Uıǵyr avtonomııalyq aýdanynyń XIV Halyq ókilderi jınalysy turaqty komıtetiniń X májilisi ótken. Daýys berýden keıin Muqııat Jarmuqametulyn Shyńjań-Uıǵyr avtonomııalyq aýdany Halyq úkimetiniń tóraǵasynyń orynbasary laýazymyna taǵaıyndaý týraly sheshim qabyldandy. Artynsha konstıtýtsııalyq ant qabyldaý rásimi ótti.
Aıta keteıik, Muqııat Jarmuqametuly 1967 jyly QHR Altaı aımaǵynyń Jemeneı aýdanynda týǵan. Ortalyq partııa mektebinde oqyǵan. Osyǵan deıin ShUAA Halyq ókilderi jınalysy turaqty komıtet basshysynyń orynbasary jáne ShUAA kásipodaqtar federatsııasynyń tóraǵasy, Búkilqytaılyq kásipodaqtar federatsııasy tóraǵasynyń orynbasary qyzmetterin atqarǵan.
Sondaı-aq 10 mamyr kúni Aqmola oblysy tabıǵı resýrstar jáne tabıǵaty paıdalanýdy retteý basqarmasynyń basshysy taǵaıyndaldy.
Jańadan taǵaıyndalǵan basqarma basshysy Djanet Qanatuly 1987 jyly Aqmola oblysy Birjan sal aýdanynda týǵan, bilimi joǵary, Sátbaev atyndaǵy Qazaq ulttyq tehnıkalyq ýnıversıtetin, Frantsııa Respýblıkasynyń Lotarıngııa ýnıversıtetin, L. B. Goncharov atyndaǵy Qazaq avtomobıl-jol ınstıtýtyn bitirgen. QR Prezıdentiniń janyndaǵy Memlekettik basqarý akademııasynyń túlegi.
Eńbek jolyn 2012 jyly Astana qalasynyń «QazQSǴZJI» RMK mamany bolyp bastaǵan.
Taǵaıyndalǵanǵa deıin Astana qalasy QR Ónerkásip jáne qurylys mınıstrliginiń qala qurylysy jáne turǵyn úı-kommýnaldyq saıasat departamenti dırektorynyń orynbasary qyzmetin atqardy.
11 mamyrda Memleket basshysynyń ókimimen Konstantın Vadımovıch Kantserov Qazaqstan Respýblıkasy Memlekettik kúzet qyzmeti bastyǵynyń orynbasary laýazymyna taǵaıyndaldy.
