Qazaqstanda ósimdik maıy óndirisi 26%-ǵa artty
ASTANA. KAZINFORM - 2024 jyly maıly daqyldar alqaby 2,9 mln ga deıin jetkizildi. Maıly daqyldar egistikteriniń eń kóp alqaptary Soltústik Qazaqstan (jalpy egis alqabynyń 23,3%), Qostanaı (23%), Pavlodar (12,5%), Abaı (10,2%), Aqmola (9,2%) jáne Shyǵys Qazaqstan (7,7%) oblystaryna tıesili.
QR Aýyl sharýashylyǵy mınıstrligi baspasóz qyzmetiniń habarlaýynsha, maıly daqyldardyń ónimi 3,3 mln tonnany qurady, bul 2023 jylmen salystyrǵanda 53% - ǵa artyq (2,1 mln tonna). Osy kólemniń 1,8 mln tonnasyn kúnbaǵys qurady.
Ósimdik maıy óndirisi ósýin jalǵastyrýda. Qazaqstanda jylyna shamamen 4,0 mln tonna shıkizatty qaıta óńdeý qýaty bar 88 kásiporyn jumys isteıdi. Olar negizinen Shyǵys Qazaqstan, Soltústik Qazaqstan jáne Abaı oblystarynda shoǵyrlanǵan.
2024 jyly barlyǵy 753 myń tonna ósimdik maıy óndirildi, bul 2023 jylmen salystyrǵanda 12% - ǵa artyq (672,1 myń tonna). 2025 jylǵy qańtar-aqpanda óndiris kólemi 2024 jyldyń uqsas kezeńimen salystyrǵanda 26,7% - ǵa, 124,8 myń tonnadan 158,1 myń tonnaǵa deıin ulǵaıdy. Onyń ishinde kúnbaǵys maıy óndirisi 22,4% — ǵa-113 myń tonnadan 138,2 myń tonnaǵa deıin ulǵaıdy.
Ótken jyly ósimdik maıy eksportynyń kólemi 582,1 myń tonnany qurady, bul 2023 jylmen salystyrǵanda 12%-ǵa artyq. Ónimder QHR-da joǵary suranysqa ıe, Ózbekstan, Tájikstan, Aýǵanstan, Qyrǵyzstan, Latvııa jáne Túrikmenstan elderinde eksport úlesi jalpy kólemniń 42,4% -yn alady.
Qaıta óńdelgen ónimderdiń eksporttyq áleýetin arttyrý úshin Qazaqstan Qytaımen yntymaqtastyqty damytýdy jalǵastyrýda. Qol qoıylǵan sanıtarlyq jáne fıtosanıtarlyq talaptar hattamalary maıly daqyldardy qaıta óńdeý ónimderin eksporttaý úshin qosymsha múmkindikter ashady.
Sondaı-aq, maı salasynyń básekege qabilettiligin arttyrý úshin AÓK sýbektilerin, sonyń ishinde maıly daqyldardy qaıta óńdeý kásiporyndaryn sýbsıdııalaý baǵdarlamasy boıynsha qoldaý kózdelgen. Osy baǵdarlama sheńberinde qarjy ınstıtýttarymen aınalym qarajatyn tolyqtyrýǵa qaryz sharttaryn jasasqan kásiporyndar jeńildikti kredıtter ala alady, bul salanyń odan ári damýyna yqpal etedi.
Osyǵan deıin aýyl sharýashylyǵy ónimderin qaıta óńdeýdi damytýdyń keshendi jospary qabyldanǵany týraly jazdyq.