Qazaqstanda ormandardy kóbeıtý qandaı máselelerdi sheshýge kómektesedi
«Meniń jobam Qazaqstan Respýblıkasyndaǵy shóleıttený máselesin zertteýge arnalǵan. El aýmaǵynyń 58%-y shólder men jartylaı shólderge jatady. Dala aımaǵy elimizdiń 27% alyp jatyr, onda sý jáne jel erozııasy baıqalady. Mundaı problemalardyń aldyn alý úshin qazirden bastap aǵash otyrǵyzýmen aınalysý kerek. Bizdiń jobanyń maqsaty – Qazaqstandaǵy aǵash egý aýqymyn keńeıtý. Ol úshin óńirdiń biregeı bıoalýantúrliligin qoldap, ormandy 5 mln ga jerge ulǵaıtý kerek», - dedi stýdent Halyqaralyq jasyl tehnologııalar jáne ınvestıtsııalyq jobalar ortalyǵynda ótken Ekologııa mınıstrimen kezdesýde.
Onyń aıtýynsha, qazir klımattyń jahandyq ózgerýi, topyraqtyń shóleıttenýi máseleleri óte ózekti. Ormandardy qoldan qurý arqyly álemdegi kómirqyshqyl gazyn qaıta óńdeý kólemin arttyrýǵa bolady.
«Osy máselelerdi sheshýdiń eń jarqyn mysaly – astananyń aınalasynda jasyl beldeý qurý boldy. Biraz ýaqyttan keıin tıimdi nátıjesin kóremiz. Biz jasyl beldeýdi sáýlelik prıntsıp boıynsha jalǵastyrýdy usynamyz», - deıdi Gúlnaz Seıitkamal.
Óz kezeginde QR Ekologııa, geologııa jáne tabıǵı resýrstar mınıstri Maǵzum Myrzaǵalıev usynysqa qoldaý bildirip, máseleniń rasynda da ózekti ekenin jetkizdi.
«Birneshe apta buryn Aral teńizine baryp keldim. Onda sekseýil otyrǵyzý boıynsha jeke baǵdarlama jasaǵymyz keledi. Ol jaqtan jyl saıyn júzdegen myń tonna tuz shyǵady. Sondyqtan biz aǵash egý jobalaryn belsendi túrde qoldaımyz», - dedi M. Myrzaǵalıev.
Aıta keteıik, QR Ekologııa, geologııa jáne tabıǵı resýrstar mınıstri Maǵzum Myrzaǵalıev Dúnıejúzilik qorshaǵan ortany qorǵaý kúni qarsańynda ekovolonterlermen, ekologııalyq fakýltetterdiń stýdentterimen kezdesti jáne Qazaqstandaǵy basty ekologııalyq problemalar týraly aıtyp berdi.
Ekologııa mınıstri ótken jyly 2050 jylǵa deıingi tómen kómirtekti ekonomıka tujyrymdamasyn daıyndaý boıynsha belsendi jumys bastalyp ketkenin eske saldy.
