Qazaqstanda óndiristik jaraqattaný deńgeıi 5,7 paıyzǵa tómendedi

NUR-SULTAN. QazAqparat - 2020 jylǵy qańtar-sáýir aılary aralyǵynda respýblıkanyń kásiporyndarynda 365 jazataıym oqıǵa tirkeldi. Onyń saldarynda 413 adam jaraqat aldy, bul 2019 jyldyń sáıkes kezeńinen 5,7 paıyzǵa tómen, dep habarlaıdy QazAqparat.

«Ekonomıka salalary boıynsha eń kóp zardap shekkender taý-ken metallýrgııa kesheni kásiporyndarynda - 77 nemese 22,5 paıyz, sondaı-aq qurylys ındýstrııasynda - 33 nemese 9,6 paıyz deńgeıinde baıqalǵan. Óndiristik jaraqattanýdyń joǵary deńgeıi Qaraǵandy (73 adam jaraqat alǵan), Shyǵys Qazaqstan (40 adam), Qostanaı (35 adam), Aqtóbe oblystarynda (25 adam) jáne Almaty qalasynda (14 adam) saqtalyp otyr», - delingen Eńbek jáne halyqty áleýmettik qorǵaý mınıstrligi málimetinde.

Eńbekti qorǵaý salasynda jıi kezdesetin ereje buzýshylyqtar qaýipsiz eńbek jaǵdaılaryn qamtamasyz etpeý, qyzmetkerlerge oqytý men nusqaý berý ótkizbeý, jeke jáne ujymdyq qorǵanys quraldarymen, arnaıy kıimmen qamtamasyz etpeýge qatysty.