Qazaqstanda óndirilgen munaıdyń qansha kólemi óńdelip jatyr

NUR-SULTAN. QazAqparat – Energetıka mınıstri Nurlan Noǵaev Qazaqstanda óndirilgen munaıdyń qansha kólemi óńdelip jatqanyn aıtyp berdi, dep habarlaıdy QazAqparat tilshisi.

Aıta ketsek, buǵan deıin Úkimet otyrysynda Nurlan Noǵaev Qazaqstanda osy jyldyń qańtarynan qazan aıyna deıin munaı jáne kondensat óndirisiniń kólemi 71,6 mln tonnaǵa jetkeni aıtylǵan edi.

«Bıylǵy qańtar-qazan aılarynyń qorytyndysy boıynsha 13 mln tonna munaı óńdeldi, bul kórsetkish qańtar-qazan aılarynyń josparyna 98,4% quraıdy. Sonyń ishinde avtobenzın boıynsha kórsetkish 3,66 mln tonnaǵa jetti, ıaǵnı osy jylǵy 10 aı josparyna 100,8%. Bıtým óndirisi 2020 jyldyń qańtar-qazan aılarynyń qorytyndysy boıynsha 949 myń tonnaǵa jetti, ıaǵnı esepti aıdyń josparyna 107,1%.

Munaı-gaz-hımııa ónimderine toqtalatyn bolsaq, onyń kólemi 298 myń tonnaǵa jetti, bul osy jyldyń 10 aıynyń josparynan asyp tústi, ıaǵnı 110,3%», - dedi ol.