Qazaqstanda oqýlyqtardyń 80% tsıfrlyq formatqa kóshirildi

ASTANA. QazAqparat - Oqýlyqtardyń 80% tsıfrlyq formatqa kóshirildi. Bul týraly Oqý-aǵartý mınıstrliginiń baspasóz qyzmetinen málim etti, dep habarlaıdy QazAqparat.

Búginde tsıfrlyq nusqadaǵy oqýlyqtar memlekettik saraptamadan ótip, oqý-ádistemelik keshender tizimine engizilgen.

Tsıfrlyq oqýlyqtardy ázirleýge elimizdiń 11 baspasy tartyldy. Pánderdi oqytýdyń ınnovatsııalyq tásilderin engizý maqsatynda pedagogter úshin ádistemelik usynymdar ázirlengen.

«Qazirgi kúni elimizdegi bastaýysh synyp oqýlyqtarynyń – 94 paıyzy, 5-9 synyp oqýlyqtarynyń – 81 paıyzy, 10-11 synyp oqýlyqtarynyń 61 paıyzy elektrondy nusqaǵa kóshirildi. 2024 jyly pánderdi tsıfrlyq oqýlyqtarmen 100% qamtý josparlanǵan», – deıdi Orta bilim komıtetiniń tóraǵasy Qanybek Jumashev.

Elektrondyq oqýlyqtarmen qatar mektepterde qosymsha oqý materıaly retinde mýltımedıalyq kontenti bar tsıfrlyq bilim berý resýrstary belsendi qoldanylyp keledi. Qazirgi kúni 50 myńnan asa tsıfrlyq bilim berý resýrsy jasalǵan.

2023 jyldyń basynan tsıfrlyq bilim berý resýrstaryna 6,7 myń mektep qosyldy. Bul resýrstardy búginde kún saıyn 3 mıllıonǵa deıin oqýshy men muǵalim qoldanyp keledi. Tsıfrlyq bilim resýrstarynda barlyq synyptardy qamtıtyn 50 myńnan asa vıdeosabaq jarııalanǵan.