Qazaqstanda nan ónimderiniń baǵasy qansha
Qazaqstanda qyryqqabat jáne kartop qosylǵan bálish, tandyr samsa, et qosylǵan jáne tátti pırog quny qansha? Salystyrý kezinde keıbir qalalar arasyndaǵy baǵada 500% aıyrmashylyq bar ekeni anyqtaldy, dep habarlaıdy Kazinform agenttiginiń tilshisi.
Qazaqstandaǵy óndiriste biryńǵaı tehnologııa, logıstıka bolǵanymen nan ónimderiniń baǵasy aımaqtarda ártúrli.
Biz elimizdegi 20 iri jáne ortasha qalalardaǵy, astanadan bastap ońtústik pen batystaǵy baǵany salystyrdyq. Baǵa ártúrli. Oǵan qospalardyń quny, básekelestik deńgeıi, logıstıka, ǵımaratty jalǵa alý jáne pisiretin aspazdardyń jalaqysy sebep.
Máselen elimizdiń ońtústigindegi Túrkistan, Shymkent jáne Qyzylordada kóshe saýdasy jaqsy damyǵan. Sondyqtan bolar baǵa tómen. Al suranys kóp ári ǵımaratty jalǵa alý quny qymbat Almaty men Astanada baǵa joǵary.
Qyryqqabat qosylǵan bálish baǵasy 135-400 teńge aralyǵynda
Baǵa Shymkentte arzan. Munda bálishti 135 teńgege satyp alýǵa bolady. Ekinshi orynda — Petropavl men Túrkistan (150 teńge), odan keıingi orynda Qyzylorda, Kókshetaý men Pavlodar (160-180 teńge) tur.
Qaraǵandy, Qostanaı men Aqtóbede baǵa 250 teńge bolsa, Astana men Jezqazǵanda da 250 teńge shamasynda. Al Almaty, Óskemen men Oralda bálish baǵasy 300-400 teńge aralyǵynda.
Peshte pisken jáne tandyr samsa
Peshte pisken samsa baǵasy qoljetimdi. Ortasha baǵasy 250-350 teńge, al keıbir óńirde odan da tómen. Máselen Qyzylordada 180 teńge, Atyraýda 260 teńge, Shymkentte 180-300 teńge aralyǵynda.
Tandyr samsa quny Astana, Jezqazǵan jáne Aqtóbede — 550-600 teńge. Shymkentte tandyr samsa quny 750 teńgege jetti. Bul elimizdegi eń joǵary baǵa. Al arzanyn Petropavldan (400 tg) jáne Qyzylordadan (300 teńge) taba alasyz.
Et qosylǵan pırogtiń kelisi — 5 200 teńge
Et qosylǵan pırog — reıtıngtegi eń qymbat nan ónimi. Qyzylorda men Túrkistanda kelisi — 2000 teńge. Bul eń tómen baǵa. Kókshetaý, Taraz, Oralda (2700-3000 teńge) baǵa sál joǵary.
Almaty, Astana, Qonaev pen Qaraǵandyda baǵa 3000-5 500 teńge aralyǵynda. Al Semeı men Óskemende baǵa — 4500-5000 teńge. Al eń qymbat et qosylǵan pırog Atyraý men Petropavlda. Munda kelisi 7200 teńgege deıin jetedi.
Tátti pırog baǵasy qospaǵa baılanysty ártúrli
Tátti pırog baǵasy et qosylǵan pırogqa qaraǵanda joǵary. Bul joldy da Túrkistanda baǵa tómen. Quny — 1200 teńge. Aqtóbe men Shymkentte 2000-2100 teńge bolyp tur.
Almaty, Astana, Taldyqorǵan, Semeı men Qonaevta ortasha baǵa — 5000-7000 teńge. Al Jezqazǵanda 8000 teńgege deıin jetip tur. Qazaqstan boıynsha qymbaty osy. Atyraý men Petropavlda baǵa — 6500-7000 teńge.
Ótken aptada Qazaqstan qalalaryndaǵy qant baǵasyn bildik.