Qazaqstanda munaı-gaz mashınasyn jasaý men servısti damytýdyń halyqaralyq ortalyǵy qurylady
Mınıstrlik málimetinshe, delegatsııa «Gas Processing Company» JShS-nyń «Qojasaı» gaz óńdeý zaýytynyń jumysymen tanysyp, Jańajol gaz óńdeý zaýytynda jáne «SNPS – Aqtóbemunaıgaz» AQ-nyń gaztýrbınaly elektr stansasynda boldy. Sapar qorytyndysy boıynsha munaı-gaz salasy, kásipkerler, Energetıka mınıstrligi men Aqtóbe oblysy ákimdigi ókilderiniń qatysýymen kezdesý ótti.
«Oblys ákimi Energetıka mınıstrliginiń aldyna ken oryndaryna jaqyn ornalasqan eldi mekenderdi gazben jabdyqtaýǵa járdemdesý, sondaı-aq olardyń turǵyndaryn jumyspen qamtamasyz etý máselesin qoıyp otyr. Biz jer qoınaýyn paıdalanýshylarmen osy máselelerdi pysyqtap, olardyń áleýmettik jaýapkershiligi aıasynda qoldaý kórsetemiz. Sondaı-aq jer qoınaýyn utymdy paıdalaný jáne qorshaǵan ortaǵa áserdi azaıtý óte mańyzdy. Jer qoınaýyn paıdalanýshynyń kelisimsharttyq merzimi aıaqtalǵanymen, ken orny men oǵan irgeles jerdi paıdalaný merzimi aıaqtalmaıdy. Bizdiń ortaq mindetimiz – ken oryndarynyń qyzmet etý merzimin ulǵaıtý. Bul tek uqypty paıdalaný kezinde ǵana múmkin bolady. Bul másele mınıstrliktiń turaqty baqylaýynda», - dedi Nurlan Noǵaev.
Áńgimelesý barysynda birqatar kásipker ózderiniń kózqarasy boıynsha jekelegen jer qoınaýyn paıdalanýshylardyń satyp alýlarynyń ashyqtyǵyna alańdaýshylyq bildirdi. Sondaı-aq ýákiletti organdardan munaı-gaz salasyndaǵy satyp alýlardaǵy jergilikti qamtýdy ulǵaıtý jónindegi jumysty kúsheıtýdi surady.
Nurlan Noǵaevtyń aıtýynsha, qazirgi ýaqytta Qazaqstanda Chevron komapnııasy 248,5 mıllıon AQSh dollaryn bólýdi josparlap otyrǵan Jergilikti qamtýdy damytý qory qurylýda. Osy qordan ınvestıtsııalar tehnologııalar men IT-ge, bazalyq taýarlar óndirisine, munaı-gaz sektory jabdyqtarynyń jekelegen túrlerin jınaqtaýǵa jáne qorshaǵan ortany qorǵaýǵa salynatyn bolady. Budan basqa, elimizde munaı-gaz mashınasyn jasaý men servısti damytýdyń halyqaralyq ortalyǵy qurylatyn bolady. Onyń maqsaty - QR-dyń munaı-gaz salasyna arnalǵan taýarlar men kórsetiletin qyzmetter óndirisin oqshaýlaý.
«Óz kezeginde jer qoınaýyn paıdalanýshylar da óz mindettemelerine, jergilikti qamtýdy damytýǵa jaýapkershilikpen qaraýy tıis. Kásipkerlerdiń shaǵymdary negizdi dep sanaımyn. Munaı-gaz salasynda tapsyrystardy oryndaıtyn shartty otandyq fırmalardyń túpkilikti benefıtsıary sheteldik kompanııalar nemese jeke tulǵalar bolyp tabylatyn jaǵdaılar kezdesip jatady. Ártúrli amal-aıla qoldanýdyń qajeti joq. Qazaqstanǵa jumys isteýge kelgen ınvestorlar jergilikti qamtýdy damytý, qazaqstandyqtardy jumysqa ornalastyrý boıynsha mindettemelerdi ózine alady, olardy oryndaý qajet», - dep atap ótti mınıstr.
Sonymen qatar ol jasandy kedergiler qoıý jáne belgili bir kompanııalar úshin arnaıy jaǵdaılar jasaý qolaısyz ekendigin basa aıtty.
«Bizge usynys engizińizder. Olardy barlyq qajetti memlekettik organdar men qoǵamdyq uıymdardy tarta otyryp qarastyratyn bolamyz. Biz óz quzyretimizdiń aıasynda iri munaı-gaz operatorlarynyń jyldyq satyp alý josparlaryn jarııalaýyna qol jetkizdik. Bul jumystardyń barlyǵy el basshylyǵy men Úkimettiń tapsyrmalaryn oryndaý aıasynda júrgiziledi. Men barlyq kompanııanyń basshylaryn buǵan tolyq jaýapkershilikpen qaraýǵa shaqyramyn», - dedi ol.
Energetıka mınıstri jer qoınaýyn paıdalanýshylardyń taýarlary men kórsetiletin qyzmetterin satyp alý kezinde tolyq ashyqtyqty qamtamasyz etýdi tapsyrdy.
Keńesti qorytyndylaı kele, Aqtóbe oblysynyń ákimi Ońdasyn Orazalın kóterilgen máselelerdiń barlyǵy óńirdiń áleýmettik-ekonomıkalyq damýy úshin mańyzdy ekenin atap ótti.
«Biz árqashan otandyq jáne sheteldik ınvestorlardy qoldaımyz, bul óńirde jańa jumys oryndaryn ashýǵa, salyq bazasyn ulǵaıtýǵa múmkindik beredi. Bul – Memleket basshysynyń tikeleı tapsyrmasy. Biraq bul rette ınvestorlar ózderiniń jaýapkershiligin sezinip, jergilikti halyq úshin áleýmettik máselelerdi sheshýge kómektesýi tıis. Biz jyl saıyn jer qoınaýyn paıdalanýshylarmen áleýmettik mindettemeler týraly memorandýmdar jasasamyz, osynyń arqasynda búkil álem úshin bıylǵy jyldyń óte kúrdeli bolǵanyna qaramastan, munaı-gaz sektoryndaǵy jumys oryndarynyń qysqarýyna jol bermeı, jalaqyny ulǵaıtýǵa qol jetkizdik. Qıyndyqtar mezgil-mezgil týyndaıdy, biz ony jasyrmaımyz. Áleýmettik aspektilerdi eskerip, óndiristik qyzmet saldarynan týyndaıtyn problemalar úshin júıeli sheshimder tabý kerek», - dedi Ońdasyn Orazalın.
