Qazaqstanda múgedektigi barlarǵa arnalǵan qansha medıtsınalyq ortalyq bar
«Halyqty áleýmettik qorǵaý salasynda birinshi jáne ekinshi toptaǵy, psıhonevrologııalyq aýrýlary bar 18 jastan asqan múgedek adamdarǵa, psıhonevrologııalyq patologııasy bar jáne tirek-qımyl apparaty buzylǵan múgedek balalarǵa statsıonar, jartylaı statsıonar jáne úıde kútim kórsetý jaǵdaılarynda arnaýly áleýmettik qyzmetterdiń kepildik berilgen kólemi usynylady. Arnaýly áleýmettik qyzmetterdiń kepildik berilgen kóleminiń tizbesi áleýmettik-turmystyq, medıtsınalyq, psıhologııalyq, pedagogıkalyq, eńbek, mádenı, ekonomıkalyq jáne quqyqtyq qyzmetterdi qamtıdy», - dep jazdy Álıhan Smaıylov depýtattyq saýalǵa bergen jaýabynda.
Onyń aıtýynsha, statsıonarda arnaıy áleýmettik qyzmet alýshylar memlekettiń tolyq qamqorlyǵynda. Búginde elimizde statsıonarlyq úlgidegi 113 medıtsınalyq-áleýmettik mekeme jumys isteıdi, onda 23 myńnan astam adamǵa qyzmet kórsetiledi.
Sondaı-aq, 9 myńnan astam adamdy qamtıtyn 115 kúndizgi bólimshe, 54 myńnan astam adamdy qamtyǵan 482 úıde áleýmettik kómek kórsetý bólimshesi, Memlekettik áleýmettik tapsyrys sheńberinde 8 myń adamdyq 164 úkimettik emes uıymdar jáne MJÁ sheńberinde 1,4 myń adamdy qamtıtyn 7 jeke uıym jumys isteıdi.
«Atalǵan mekemelerdiń jumysy múgedek adamdardy ońaltýǵa jáne áleýmettendirýge baǵyttalǵan. Halyqty jumyspen qamtý sharalary aıasynda múgedektigi bar adamdarǵa erekshe kóńil bólinedi», - dep túsindirdi Premer-Mınıstrdiń orynbasary.
